सिमकोट–राष्ट्रिय सभाको टिकट वितरणमा पार्टी केन्द्रका  नेताहरुले आफूखुसी गरेको भन्दै सत्ताको नेतृत्वकर्ता दल माओवदी केन्द्र हुम्लाका सबै जनप्रतिनिधिले मतदान प्रक्रियामा भाग नलिने निर्णय गरेका छन् । 

सत्ता गठबन्धनबिच राष्ट्रियसभाको सिट बाँडफाँडको टुंगो लागेका बेला कर्णाली प्रदेश र संघीय सरकारको नेतृत्व गरेको माओवादी हुम्लाले गरेको लिखित निर्णयले गठबन्धनमा ठूलो संकट उत्पन्न भएको छ । सातवटा गाउँपालिका भएको हुम्लाबाट स्थानीय तह, प्रदेश सभा र प्रतिनिधि सभामा निर्वाचित आठ जनप्रतिनिधिले आसन्न राष्ट्रिय सभा निर्वाचन र पार्टीका प्रदेश तथा केन्द्रका कुनैपनि गतिविधिमा सहभागी नहुने निर्णय गरेका छन् । 

राष्ट्रिय सभा सदस्यको उमेरदवारका लागि माओवादी केन्द्र हुम्लाबाट जिल्ला समन्वय कमिटीमा संयोजक डा. दीपेन्द्र रोकायालाई एकल सिफारिस गरेपनि प्रदेश र केन्द्र पार्टीबाट संवोधन नहुने भएपछि शनिबार संघीय राजधानीमा बसेको जनप्रतिनिधिहरुको सामूहिक बैठकले यस्तो निर्णय गरेपछि सत्ता गठबन्धनमा ठूलो हलचल भएको छ । 

माओवादी केन्द्रीय सदस्य तथा सिमकोट गाउँपालिका अध्यक्ष विजय भण्डारी (प्रतिरोध) को अध्यक्षतामा बसेको बैठकले पार्टीको सांगठनिक तथा आम निर्वाचनमा ठूलो भूमिका खेलेको हुम्लालाई नेताहरुको पूर्वाग्रही सोचका कारण प्राथमिकता नपरेको निचोड निकालेको छ । 

‘विभिन्न ९ वटा निर्णय गरेको बैठकमा अहिलेसम्म जुन रुपमा माओवादी केन्द्र हुम्लाको भूमिकालाई बाइपास गर्ने काम भयो, त्यसले हामीलाई आसन्न माघ ११ गतेको राष्ट्रिय सभाको निर्वाचनमा भाग नलेऊ भन्ने निर्देशन गरेको छ,’ माओवादी कर्णाली प्रदेश उपसचिव समेत रहेका ताँजकोट गाउँपालिकाका अध्यक्ष लालकेश जैशीले भने,’अब हामी कुनैपनि हालतमा उपस्थितीमा पार्टीका प्रदेश र केन्द्रीय स्तरका गतिविधि लगायत राष्ट्रिय सभा निर्वाचनको मतदान प्रक्रियामा भाग लिन सक्दैनौँ ।’

निर्वचनको सम्मुखमा आयोजना गरिएको पुस २५ र २६ गतेको कर्णाली प्रदेश कमिटी बैठकमा समेत सहभागिता नजनाउने निर्णय गरेको बताउनु भएका केन्द्रीय सदस्य भण्डारीका अनुसार संगठन निर्माणका लागि अरुलाई ताकेता गर्ने प्रदेशका नेताहरुले पार्टीको लाभ वितरणमा आफू केन्द्रित भएर हेरेकै कारण लामो समयको पर्खाइपछि हुम्लाले अप्रिय निर्णय गरेको हो । 

‘हाम्रो टाउको छेदन गरेपनि, अहिलेको पार्टी र सत्ताको पद खोसेपनि खोसियोस् तर अलिहेकै स्थितिमा पार्टीले पुर्नबीचार नगरे माओवादी केन्द्र हुम्ला न पार्टीका प्रदेश र केन्द्रीय गतिविधिमा सामेल हुन्छ न आसन्न राष्ट्रिय सभा निर्वाचनमा नै सहभागी हुन्छ’, नेता भण्डारीले थप्नुभयो । 

पार्टीका केन्द्रीय सदस्य छिमिजोर्जी लामासहित अन्य आठजना जनप्रतिनिधिहरुको उपस्थिती गराइउपनि ५ जनाको हस्ताक्षर भएको बैठकले अहिलेसम्म माओवादी पार्टीको सांगठानिक र राजकीय जिम्मेवारीमा कुनैपनि बेला हुम्लाले न्याय नपाएको भन्दै पहिलो पटक लिखित असन्तुष्टि जनाएको छ । 

‘प्रतिनिधि सभा र प्रदेश सभाको निर्वाचन होस् वा स्थानीय तहको निर्वाचन होस् सबैमा माओवादीको आधार इलाका बनाएको हुम्लालाई राजकीयदेखि पार्टीको सांगठानिक जिम्मेवारीमा जहिल्यै विभेद गर्ने काम भएको छ’, निर्णयका बारेमा जानकारी दिँदै पार्टीका कर्णाली प्रदेश उपसचिव समेत रहेका ताँजकोट गाउँपालिका अध्यक्ष जैशीले भन्नुभयो, ‘हरेक पटक भोट हाल्ने हुम्ला माओवादीले यस पटक कुनैपनि हालतमा टिकट पाएन भने आगामी माघ ११ गते हुने राष्ट्रियसभा निर्वाचन र प्रदेश देखि केन्द्रमा हो पार्टीको सांगठनिक कामलाई समेत बहिष्कार गर्ने निचोडमा हामी पुगेका हौँ ।’

माओवादी उपमहासचिवद्धय जनार्दन शर्मा (प्रभाकर)ले रुकुमपश्चिम, शक्तिबहादुर बस्नेतले जाजरकोट र केन्द्रीय सदस्य महेन्द्रबहादुर शाहीले कालीकोटमा मात्रै केन्द्रित गरेका कारण हुम्ला यस्तो निर्णय लिन बाध्य भएको नेताहरुले बताएका छन् । माओवादी हुम्लाले पार्टी अध्यक्ष तथा प्रधानमन्त्री पुष्पकमल दाहाल (प्रचण्ड)लाई यो निर्णय बुझाइसकेको छ ।

माओवादीबाट हुम्लाका प्रतिनिधि सभामा छिरिङदम्डोल लामा (कार्चेन), कर्णाली प्रदेश सभामा रणसिंह परियार, जुम्कीत लामा, सिमकोट गाउँपालिका अध्यक्ष विजय भण्डारी (प्रतिरोध), ताँजकोट गाउँपालिका अध्यक्ष लालकेश जैशी, नाम्खा गाउँपालिका अध्यक्ष प्रेम लामा, अदानचुली गाउँपालिका उपाध्यक्ष कर्ण रोकाया (सुधार) र खार्पुनाथ गाउँपालिका उपाध्यक्ष रहेका छन् ।

माओवादीले कर्णालीबाट कालिकोटका विष्णु बिकलाई राष्ट्रिय सभाका लागि अघि सार्ने औपचारिक निर्णय गरिसकेको छ । 

कर्णाली प्रदेशमा पार्टीको आधार इलाकाका रुपमा रुकुमपश्चिम र कालीकोट पछिको तेस्रो स्थान हुँदा पनि पार्टीले दिने लाभका पदमा जहिले पनि अन्यायमा गरेका कारण यस पटक माओवादी हुम्लाले गरेको निर्णयको हुम्ला पार्टीका तर्फबाट सामाजिक सञ्जालमा स्वागत गरिएको छ । निर्वाचनमा ज्यान फालेर पार्टीलाई जिताउँदा पनि प्रदेश र संघको सरकार गठनदेखि केन्द्रीय सदस्य मनोनयनमा केन्द्रबाट हुने विभेदकै प्रतिफल माओवादीको यात्रा ओहलोतर्फ उन्मुख भएको भन्दै जिल्ला देखि गाउँस्तरका नेता तथा कार्यकर्ताले सामाजिक सञ्जालमा विरोध जनाएका छन् ।