काठमाडौँ– नेकपा एकता राष्ट्रिय अभियानका अध्यक्ष वामदेव गौतमले नयाँ गठबन्धनलाई समर्थन गर्नुभएको छ ।
गौतमले मंगलबार एक प्रेस विज्ञप्ति जारी गर्दै नयाँ सत्ता गठबन्धनलाई समर्थन गर्ने ६ कारण रहेको उल्लेख गर्नुभएको छ । उहाँले अहिलेको गठबन्धनले सही राजनीतिक दिशा पकडेको उल्लेख पनि गर्नुभएको छ ।
विज्ञप्तिमा गौतमले भन्नुभएको छ, ‘नेकपा एमालेका अध्यक्ष केपी ओली र नेकपा माओवादी केन्द्रका अध्यक्ष एवं प्रधानमन्त्री प्रचण्डको पहलमा हिजो २१ फागुन २०८० का दिन नेपालको राजनीति र सत्ता सम्बन्धमा नयाँ गठबन्धन सुरु भएको छ। हाम्रो पार्टीले हिजो बिहानै यो गठबन्धनलाई समर्थन गरिसकेका छौ । हाम्रो समर्थन वा विरोधले राष्ट्रिय राजनीतिमा कुनै फरक पार्दैन। तथापि हामीले आफ्नो पङ्क्तिलाई स्पष्ट पार्न यो वक्तव्य जारी गर्नुपरेको हो ।’
यस्ता छन् समर्थन गर्नुका कारण:
१) कम्युनिस्ट र कांग्रेसले उत्पादन पद्धतिमा दुई विपरीत तत्त्वको प्रतिनिधित्व गर्दछन् । अहिलेको गठबन्धनले सही राजनीतिक दिशा पकडेको छ ।
२) अब नेपाली कांग्रेस पार्टी बिपी कोइरालाको राजनीतिक लाइनमा हिँड्छ होला ।
३) सत्ता स्वाद लिन जे पनि गर्ने राजनीतिक भाँडभैलो अन्त्य हुन्छ होला ।
४) अव वास्तविक राजनीतिक प्रतिस्पर्धामा जनता खुसी भएर सामेल हुने छन् ।
५) २०७७ मा नेपाल कम्युनिस्ट पार्टी (नेकपा) विभाजन गर्नु महाभूल थियो भन्ने पुष्टि भएको छ ।
६) हाम्रो सीधा लप्पनछप्पनविनाको आशा र विश्वास यही नै हो । तर, हाम्रो आशा बमोजिम भएन भने पनि पश्चात्ताप गर्न पर्ने छैन ।
प्रतिक्रिया