काठमाडौँ– संघीय संसद्का दुवै सदनको बैठक आज बस्दै छ । प्रतिनिधिसभा र राष्ट्रियसभाको बैठक आज बस्न लागेको हो ।
प्रतिनिधिसभा ११ बजे र राष्ट्रियसभाको बैठक १:१७ बजे बस्ने संसद् सचिवालयले जनाएको छ ।
संसद्का दुवै सदनमा आजदेखि नेकपा एमाले सत्ता पक्षको बेन्चमा बस्ने छ । यसअघि प्रमुख प्रतिपक्षको भूमिकामा रहेको एमाले आजदेखि सत्तापक्षको भूमिकामा बस्ने भएको हो ।
प्रधानमन्त्री पुष्पकमल दाहाल प्रचण्डले नेपाली काँग्रेससँगको गठबन्धन भत्काएर नेकपा एमालेसँग नयाँ सत्ता समीकरण गरेका छन् । नयाँ सत्ता समीकरणसँगै एमाले सत्तापक्ष र कांग्रेस प्रमुख प्रतिपक्षको बेन्चमा पुगेको हो ।
एमाले प्रमुख सचेतक महेश बर्तौलाले आफूहरू संविधान अनुसार सत्ता पक्षको भूमिकामा बस्ने बताउनुभएको छ । यसअघि प्रमुख प्रतिपक्षमा हुँदा सरकारको निगरानी गर्ने भूमिकामा रहेको भन्दै उहाँले अब सत्ता पक्ष भएपछि जिम्मेवार सत्ता पक्षको भूमिका निर्वाह गर्ने बताउनुभयो ।
उहाँले भन्नुभयो,’हिजो प्रतिपक्षमा हुँदा सरकारको निगरानी गर्ने भूमिकामा थियौँ । अब सत्ता पक्षमा भएपछि स्वाभाविक रुपमा सरकारको तबरबाट उपयुक्त डेलीभरिको माध्यमबाट नागरिकहरूका अपेक्षा पुरा गर्न र जिम्मेवार सत्ता पक्षको भूमिका निर्वाह गर्ने र त्यही भूमिकामार्फत आफूलाई प्रस्तुत गर्नेछौँ ।’
प्रमुख सचेतक बर्तौलाले संसद् जिम्मेवार सत्ता पक्ष र जिम्मेवार सरकार पक्ष भएकाले त्यही अनुसार संसद्लाई अगाडि बढाउने बताउनुभयो ।
प्रतिक्रिया