काठमाडौँ– प्रतिनिधिसभाका सभामुख देवराज घिमिरेले ल्होसार पर्वले राष्ट्रिय एकतालाई थप सुदृढ बनाउन सहयोग गर्ने विश्वास व्यक्त गर्नुभएको छ ।  

हिमाली आदिवासी शेर्पा समुदायको नयाँ वर्ष २१५१ औँ ग्याल्पो ल्होसार (डुक ल्हो)को अवसरमा शुभकामना व्यक्त गर्दै उहाँले ल्होसार पर्वले विविध जातजाति, भाषाभाषी, संस्कृति र भौगोलिक क्षेत्रका नेपालीका बिचमा आपसी सद्‍भाव र सहिष्णुतालाई प्रगाढ बनाउँदै  राष्ट्रिय एकतालाई थप सुदृढ बनाउन सहयोग गर्ने विश्वास व्यक्त गर्नुभएको भएको हो । 

प्रत्येक वर्ष फागुन शुक्ल प्रतिपदाका दिन शेर्पा समुदायले मनाउने ग्याल्पो ल्होसार आफन्त भेटघाट र पूजाआजा गर्नुका साथै गुथुक र खाप्से जस्ता खानेकुरा खाएर विभिन्न पिकनिक तथा सांस्कृतिक कार्यक्रम गरी मनाइन्छ । 

सभामुख घिमिरेको शुभकामनामा भनिएको छ, नेपाल विभिन्न जाति, भाषा र संस्कृतिमा धनी छ । हरेक जातजातिका आफ्नै विशेषता बोकेका फरक–फरक चाडपर्व छन् । हिमाल, पहाड र तराई मिलेर बनेकाले ठाउँ अनुसार फरक संस्कार र संस्कृति हुन्छन् । सनातनदेखि आस्थाको धरोहरको रुपमा रहेका हाम्रा चाडपर्वले विविधताभित्रको एकता उद्घाटित हुँदै आएको छ । नेपाली चाडवाड, संस्कृति, संस्कार मनाइरहँदा नयाँ पुस्तालाई पनि सँगसँगै सहभागी गराउन जरुरी छ । मौलिक चाडवाडको संरक्षण र संवर्द्धन  गर्दै मौलिकता हस्तान्तरण गर्न नयाँ पुस्तालाई प्रेरित गर्न आवश्यक छ । 

ल्होसार पर्वलाई कम खर्चिलो र लोप हुन लागेका परम्परा जगेर्ना गर्दै मौलिक पर्वका रुपमा मनाउन प्रेरणा मिलोस् भन्ने उहाँले कामना गर्नुभएको छ ।