काठमाडौँ– नेकपा एमालेका नेता गोकुल बास्कोटाले आफूले राजनीतिमा असम्भव भन्ने शब्दावली डिलिट गरिदिएको बताउनुभएको छ । नेकपा एकीकृत समाजवादीप्रति व्यङ्ग्य गर्दै उहाँले यस्तो बताउनुभएको हो । 

एकीकृत समाजवादीको हिजो बसेको संसदीय दलको बैठकले प्रधानमन्त्री पुष्पकमल दाहाल प्रचण्डसँग लिखित सहमतिपछि मात्रै सरकारलाई विश्वासको मत दिने निर्णय गरेको थियो । एकीकृत समाजवादीले अध्यक्ष माधव नेपाललाई प्रधानमन्त्री बनाउनुपर्ने माग गरेको हो । 

तर यसमा सत्ता साझेदार दल नेकपा एमाले र माओवादी केन्द्रले सहमति जनाएका छैनन् । एकीकृत समाजवादीले लिखित सहमति नजनाए प्रधानमन्त्रीलाई विश्वासको मत नदिने उसको अडान छ । 

आज सामाजिक सञ्जालमा लेख्दै नेता बास्कोटाले भन्नुभयो,  ‘एक वर्ष प्रम ग्यारेन्टी हुने प्रचण्ड पत्र मेटमणीले माधव नेपाललाई दिलाएरै छाड्ने पक्का देखियो । राजनीति हो,असम्भव भन्ने शब्दावली डिलिट हान्दिए ल ! जे पर्छ परोस् ।’

प्रधानमन्त्री प्रचण्डले नेपाली कांग्रेससँगको गठबन्धन भत्काएर एमालेसँग नयाँ सत्ता समीकरण गरेपछि एकीकृत समाजवादी पनि सरकारमा सहभागी भएको छ । यसअघि कांग्रेससँगको गठबन्धनमा माधव नेपाललाई एक वर्ष प्रधानमन्त्री बनाउने सहमति भएको थियो ।