काठमाडौँ– नेकपा माओवादी केन्द्रका नेता राम कुमार शर्माले पार्टीको सम्पूर्ण जिम्मेवारीबाट राजीनामा दिएको घोषणा गर्नुभएको छ । आज सामाजिक सञ्जालमा लेख्दै उहाँले पार्टीको सम्पूर्ण जिम्मेवारीबाट राजीनामा दिएको घोषणा गर्नुभएको हो । 

पार्टी अध्यक्ष पुष्पकमल दाहाल प्रचण्डलाई सम्बोधन गर्दै उहाँले पटक–पटक गठबन्धन फेर्नाले देशलाई अँध्यारोतर्फ धकलेको आफूले महसुस गरेको उल्लेख गर्नुभएको छ । 

उहाँले लेख्नुभएको छ,’सम्माननिय प्रधानमन्त्री प्रचण्ड ज्यूले दैनिक जसो अभिव्यक्तिमा सुशासन, समृद्धि र सामाजिक न्यायको कुरा जति नै गरेपनि माओवादी पार्टीका प्रमुख पदाधिकारीहरू विभिन्न भ्रष्टाचार काण्डमा संलग्न हुनु ! माओवादी पार्टी,  पार्टी नभएर गुटै गुटका महासंघको रूपमा रूपान्तरण हुनु ! १० वर्षे जनयुद्धको दौरान आफैले उठाएको मुद्दाबाट च्युत हुँदै जानु र जनादेश विपरीत विदेशी शक्तिको आडभरोसामा सरकारमा रहन कै लागि पटक–पटक गठबन्धन फेरिरहने र देशलाई अस्थिरता एवं विदेशीको क्रिडास्थल बनाई अन्नत अँध्यारो दिशातर्फ धकेलेको महसुस गरेको छु ! यस्तो अवस्थामा माओवादी पार्टीमा बसिरहन मेरो नैतिकताले दिएन तसर्थ आजकै मितिबाट म राम कुमार शर्मा नेकपा (माओवादी केन्द्र)को सम्पूर्ण जिम्मेवारीबाट राजीनामा दिएको छु !’

नेता शर्माले माओवादीमा संलग्न हुँदा आफूले देखेको सपना र अहिले पार्टीका प्रमुख नेतृत्व र सरकारबाट भइरहेको कामको समीक्षा गर्दा आकाश पतालको फरक पाएको बताउनुभएको छ ।  

उहाँले लेख्नुभएको छ,’माओवादी पार्टीले  लिएका क्रान्तिकारी नीतिहरू आत्मनिर्णयको अधिकार र पहिचानसहितको प्रादेशिक संरचना, प्रत्यक्ष निर्वाचित राष्ट्रपतिसहित पूर्ण समानुपातिक  समावेशी संसद्, क्रान्तिकारी भूमिसुधार, निःशुल्क एवं गुणस्तरीय शिक्षा र स्वास्थ्यको साथै रोजगारीको ग्यारेन्टीसहित नयाँ नेपाल बनाउने सपना मात्रै तुहिएको छैन ! महान् जनयुद्धको समय आदर्श मानिएका प्रमुख पदाधिकारीहरू नै विभिन्न भ्रष्टाचार काण्डमा संलग्न भएको देखेर आत्म ग्लानि मात्रै भएको छैन १७ हजार नेपाली नागरिकले दिएको बलिदान र त्यसको जगमा भएको महान् जनयुद्धलाई नै कलंकित गर्ने काम भइरहेको महसुस गरेको छु ! 

नेता शर्मा सरकारी सेवा छाडेर माओवादीमा लाग्नुभएको थियो । उहाँले निर्वाचित संविधान सभा पदबाट राजीनामा पनि दिनुभएको थियो ।