काठमाडौं– हिजोसम्म माधव नेपाल समूहमा रहनुभएका एमाले सांसद कृष्णभक्त पोखरेल आज एमाले संसदीय दलको बैठकमा उपस्थित हुनुभएको छ । उहाँले संसदीय दलको बैठकमा पटक पटक नआउने सांसदलाई कारबाही गर्न दलका नेता एवं प्रधानमन्त्री केपी शर्मा ओलीलाई आग्रह गर्नुभएको छ ।

बालुवाटारमा आयोजित संसदीय दलको बैठकमा पोखरेलले एमाले संसदीय दलको विधानको मस्यौधाकार आफू नै भएकोले त्यसको मर्म अनुसार बैठकमा उपस्थित भएको जानकारी दिनुभयो ।

बैठकमा नआएका माधव नेपाल लगायतका नेताहरुप्रति लक्षित गर्दै उहाँले भन्नुभयो, ‘कि हाम्रो संसदीय दलको नेता अर्को छ, हाम्रो पार्टी अर्को छ भन्न सक्नुपर्‍यो । होइन भने संसदीय दलको नेताले बोलाएको बैठकमा आउनुपर्‍यो । पटक पटक बैठकमा नआउनेलाई कारबाही गर्नुपर्दछ ।’

बैठकमा पोखरेलले बेलायतमा जोन मेजरलाई हटाउन खोजेजस्तै अहिले प्रधानमन्त्री ओलीलाई हटाउन खोजिएको बताउनुभयो । ‘बेलायतमा जोन मेजरलाई पनि हटाउन खोजे । ससंसदीय दलको निर्वाचन भयो । अर्को एउटाले उम्मेदवारी हालेको थियो । भरे फिर्ता गर्‍यो । अनि उहाँले ढुक्कले पाँच वर्ष सरकार चलाउनुभयो । त्यसैगरी हाम्रो पनि प्रधानमन्त्रीले पाँच वर्ष सरकार चलाएर चुनावमा हामी गरेका प्रतिवद्धता पुरा गर्नुपर्दछ ।’