काठमाडौं– जनमत पार्टीका अध्यक्ष सिके राउतको घर पत्ता नलागेपछि अदालतले ३५ दिन भित्र हाजिर हुन सूचना जारी गरेको छ ।

जिल्ला अदालत नवलपरासीले सोमबार सरकारी सञ्चार माध्यम गोरखापत्रमा एक सूचना जारी गरी राउतको घर पत्ता नलागेकोले सूचना बमोजिम ३५ दिन भित्र अदालतमा हाजिर हुन ताकेता गरेको छ ।

राउतलाई राज्य विरुद्धको संगठित अपराधमा अदालतमा हाजिर हुन भनिएको हो । अदालतद्वारा जारी सूचनामा जिल्ला रौतहट महादेव गाउँपालिका वडा नं २ घर भई हाल जिल्ला धनुषा जनकपुर उपमहानगरपालिका वडा नं ८ डेरा गरी बस्ने सिके राउत भनिने चन्द्रकान्त राउतलाई बाटोको म्याद बाहेक ३५ दिनभित्र आफ्नो सबुद प्रमाण सहित हाजिर हुन आउनु भनिएको छ । हाजिर हुन नआएमा कानुन बमोजिम हुने चेतावनी सूचनामा उल्लेख छ ।

राउत गतवर्षसम्म छुट्टै मधेसको माग गर्दै स्वतन्त्र मधेस अभियान सञ्चालन गर्दै हुनुहुन्थ्यो । सरकारसँग वार्तापछि उहाँले त्यो अभियान छोडेर जनमत पार्टी स्थापना गर्नुभएको हो ।