काठमाडौं– एमाले माओवादी ब्युताउँने फैसलाविरुद्ध पुनरावलोकन निवेदन दिन माओवादी केन्द्रका अध्यक्ष पुष्पकमल दाहाल प्रचण्ड सर्वोच्च अदालत जानुभएको छ ।
सर्वोच्च अदालतले नेकपा एकतालाई २०७५ जेठ ३ अघिको अवस्थामा फर्काइदिएपछि फैसलाविरुद्ध नेकपा माओवादी केन्द्रका अध्यक्ष न्यायिक पुनरावलोकनका लागि सर्वोच्च अदालत जानुभएको हो । पुनरावलोकन निवेदन बरिष्ठ अधिवक्ता शम्भु थापा, रामनारायण विडारी, रमन श्रेष्ठ लगायतले तयार पार्नुभएको थियो ।
न्यायिक पुनरावलोकन जानेबारे प्रचण्डले निलम्बित एमाले नेता माधवकुमार नेपाल र भीम रावलसँग सोमबार छलफल गर्नुभएको थियो ।
अदालतले फागुन २३ गते नेकपा कट्टेलको हुने ठहर गर्दै तत्कालिन नेकपा अध्यक्ष केपी शर्मा ओली र प्रचण्डलाई १५ दिनभित्र अर्को नाम लिएर निर्वाचन आयोगमा जान वा आ-आफ्नै पार्टी एमाले र माओवादीमा फर्किन भनेको थियो ।
पुनरावलोकन निवेदन दर्ता गरेपछि अध्यक्ष प्रचण्डले सर्वोच्चले फैसला सच्याउनेमा आशावादी भएको बताउनुभएको छ ।
‘विगतमा पनि टिप्पणी भएपछि सर्वोच्चले पुनरावलोकन गर्ने गरेको छ, हामीलाई विश्वास छ देशको स्थायित्व, शान्ति र समृद्धिका लागि एकताबद्ध भएका दललाई विभाजित गर्ने फैसला सच्याउनेछ,’ उहाँको भनाइ थियो, ‘निवेदनकले नाममात्रै करेक्सन गरोस् भनेर माग गर्नुभएको थियो ।’
प्रचण्डले केही दिनभित्रै सर्वोच्चले पुनरालोकन गर्ने विश्वास व्यक्त गर्नुभयो ।
प्रतिक्रिया