काठमाडौं- वन तथा वातावरणमन्त्री प्रेमबहादुर आलेले कैलालीको मोहन्याल गाउँपालिकाका अध्यक्ष नवलसिंह रावलको निधनप्रति गहिरो दुःख व्यक्त गर्नुभएको छ । ७७ वर्षको उमेरमा अध्यक्ष रावलको उपचारका क्रममा काठमाडौंको अन्नपूर्ण न्यूरो अस्पतालमा आज बिहान निधन भएको हो ।
मन्त्री आलेले आजै न्यूरो अस्पतालमा पुगेर मृतक अध्यक्ष रावलका आफन्तसँग भेटसमेत गर्नुका साथै उहाँको शव कैलाली लैजानका लागि ५० हजार रुपैयाँ आर्थिक सहयोगसमेत गर्नु भएको छ ।
लामो समयदेखि उच्च रक्तचापले ग्रसित रावललाई चार दिनअघि मात्रै ‘ब्रेन हेमब्रेज’ भएको थियो ।
उहाँलाई कोहलपुर मेडिकल कलेजमा उपचारपछि थप उपचारका लागि काठमाडौं ल्याएको उहाँका घरपरिवारले जनाएको छ । रावल नेकपा एमालेबाट गाउँपालिकाका अध्यक्षमा निर्वाचित हुनुभएको थियो । नेकपा एमालेको कैलाली जिल्लामा संस्थापक नेतामध्ये रावल एक हुनुहुन्थ्यो ।
उहाँको शव कैलाली लैजाने तयारी भइरहेको छ ।
प्रतिक्रिया