काठमाडौं– प्रधानमन्त्री केपी शर्मा ओली आजको प्रतिनिधि सभा बैठकमा सहभागी हुनुहुने भएको छ ।

दिउँसो १ बजे बस्ने बैठकमा प्रधानमन्त्री जाने कार्यक्रम रहेको स्वकीय सचिवालयले जनाएको छ । पुनर्स्थापित संसदको पहिलो बैठकका लागि संसद भवन गए पनि बैठक ढिला हुँदा प्रधानमन्त्री बाहिरिनुभएको थियो । त्यसपछिका कुनै पनि बैठकमा प्रधानमन्त्री सहभागी हुनु भएको छैन ।

दुई दिनअघि प्रधानमन्त्री र सभामुखबीच भेट भएको थियो ।

चालू अधिवेशन अन्त्य गर्ने तयारी भएको छ ।

सभामुख अग्निप्रसाद सापकोटाले विपक्षीको मागमा सहमति जनाउँदै अधिवेशनको पहिलो बैठकमा नै अध्यादेश पेस गर्नुपर्ने कार्यसूची पूरा गर्न नसकेपछि संसदले बिजनेस पाएको छैन । आज पनि सामान्य कार्यसूची रहेको छ ।

आजको बैठकमा वार्षिक प्रतिवेदन पेस गर्नेबाहेक भएका पूर्वसांसदद्वय नविन्द्रराज जोशी र लक्ष्मीदेवी भण्डारीको निधनमा शोक प्रस्ताव पारित गर्ने कार्यसूची छ ।