काठमाडौं– आसन्न पत्रकार महासंघको निर्वाचनका लागि व्यावसायिक प्रेस चौतारी नेपालले व्यावसायिक पत्रकारहरुको टिमलाई मैदानमा उतारेको छ ।

चौतारीले केन्द्र देखि प्रदेशसम्म उठाएका उम्मेदवारहरु दैनिक समाचार संकलन, छायांकन, समाचार लेखन र सम्पादनमा वर्षौंदेखि तल्लिन रहेको टिम छ । केन्द्रीय अध्यक्षमा उम्मेदवार हुनुभएकी निर्माला शर्मा अढाइ दशक देखि व्यावसायिक पत्रकारितमा हुनुहुन्छ ।

शर्माले पोखराका विभिन्न पत्रपत्रिका देखि काठमाडौंको श्रीसगरमाथा दैनिकमा रिर्पोेटिङ गर्नुभएको हो । करिअरको सुरुवात देखि नै खोजी समाचार र महिलाका विषयमा खास रुची राख्ने शर्मा कालान्तरमा सञ्चारमा लैंगिक समानाताको वकालत गर्ने संस्था सञ्चारिका समुहकी अध्यक्ष हुनुभयो । हाल कान्तिपुर टेलिभिजनमा महिला हिंसाविरुद्ध र महिला अधिकारका मुद्धाको वकालत गर्ने कार्यक्रम समकोणको उत्पादन र सञ्चालन गर्नुहुन्छ ।

चौतारीले महासचिवमा यूवा पत्रकार बालकृष्ण बस्नेतलाई अघि सारेको छु । अदालती रिर्पोटिङमा विषेश दक्षता भएका बस्नेत हाल खुला नेपाल डट कममा सल्लाहकार सम्पादक हुनुुहुन्छ । दुई दशक कान्तिपुर दैनिकमा काम गरेका बस्नेत जिल्लाका पत्रकारका समस्याका बारेमा जानकार हुनुहुन्छ । जिल्ला ब्यूरो प्रमुख हुँदा उहाँले नियुक्त गर्नुभएका जिल्ला संवाददाता नै अहिले कान्तिपुरको न्यूजरुममा हाबी भएका छन् । श्रमजीवीको हित श्रमजीवीबाट मात्र सम्भव छ भन्ने बस्नेत महासंघकै अगुवाइमा मात्र श्रमजीवी पत्रकार ऐन कार्यान्वयन सम्भावन छ भन्नुहुन्छ । यो अभियानको नेतृत्व आफूले गर्ने बस्नेतको दाबी छ ।

चौतारीले प्रदेश अध्यक्षमा पनि व्यावसायिक पृष्ठभूमिका पत्रकारहरुलाई नै अघि सारेको छ । प्रदेश नं १ को अध्यक्षमा मोहनकाजी अर्थात मोहन काजी मैदानमा खडा हुनुभएको छ । दुईदशकदेखि पत्रकारितामा संलग्न नेउपाने सरल र मिलनसार स्वभावका हुनुहुन्छ । यस अघि पत्रकार महासंघको पूर्वाञ्चल संयोजक भइसक्नुभएका काजी हाल लोकतन्त्रपोष्ट दैनिकका प्रधान सम्पादक हुनुहुन्छ । व्यावसायिक दक्षता र पेसागत सुरक्षालाई मुल मुद्धा बनाएर मैदान आउनु भएका नेउपानेको व्यावसायिक सक्रियता धेरैका लागि उदाहरणीय छ ।

प्रदेश नं २ मा प्रेस चौतारी र प्रेस मञ्चले गरेको चुनावी गठबन्धन अनुसार मञ्चका नेता राजेशकुमार कर्णलाई अध्यक्षमा अघि सारिएको छ । धनुषाका कर्ण प्रेस मञ्चका केन्द्रीय उपाध्यक्ष हुनुहुन्छ । तीन दशकदेखि पत्रकारितामा रहेका वहाँ जनकपुर टेलिभिजनको समाचार सम्पादक हुनुहुन्छ ।

बागमती प्रदेशको अध्यक्षमा चितवनाका पत्रकार हरीप्रसाद पोख्रेल मैदानमा आउनुभएको छ । अढाइ दशकदेखि पत्रकारितामा सक्रिय पोख्रेल समाचार पत्र दैनिकमा कार्यरत हुनुहुन्छ । पोख्रेल स्वदेशमा मात्र होइन विदेशमा समेत पत्रकारितामा सक्रिय हुनुहुन्थ्यो । २०६७ सालमा पोख्रेल महासंघको जापान शाखाको सचिव समेत हुनुभएको थियो ।

प्रेस चौतारी नेपालले गण्डकी प्रदेशबाट दीपेन्द्र श्रेष्ठलाई अध्यक्ष उम्मेदवार बनाएको छ । श्रेष्ठ दुई दशकदेखि पत्रकारितामा संलग्न हुनुहुन्छ । उहाँ अहिले एभरेस्ट एफएम र एभरेस्ट आवाज डट कमको नेतृत्व गर्नुभएको छ । उहाँ नेपाल महासंघ कास्कीका अध्यक्ष हुनुहुन्छ । श्रेष्ठ दुई कार्यकाल प्रेस चौतारीका सल्लाहकार हुनुहुन्छ ।

लुम्बिनी प्रदेशको अध्यक्षमा संगठनले बुटवलका पत्रकार भरत केसीलाई अघि सारेको छ । दुईदशक देखि पत्रकारितामा रहेका केसी प्रेस चौतारी नेपालको सचिव हुनुहुन्छ र पत्रकार महासंघ लुम्बिनी प्रदेशको उपाध्यक्ष हुनुहुन्छ । केसी हाल राष्ट्रिय समाचार समिति लुम्बिनी प्रदेशको प्रमुख हुनुहुन्छ । उहाँले विभिन्न स्थानीय र राष्ट्रिय सञ्चार माध्यममा काम गरिसक्नुभएको छ ।

कर्णाली प्रदेशको अध्यक्षमा चौतारीले बिष्णु शर्मालाई उम्मेद्वार बनाएको छ । दैलेखका शर्मा करिब दुई दशकदेखि पत्रकारितामा हुनुहुन्छ । महासंघको दैलेख शाखाका पूर्व अध्यक्ष शर्मा अहिले नेपाल टेलिभिजनमा काम गर्नुहुन्छ ।

सुदूरपश्चिम प्रदेशका अध्यक्षमा चौतारीले कृष्ण ओलीलाई उम्मेदवार बनाएको छ । ओली प्रेस चौतारी सुदुरपश्चिमका संयोजक हुनुहुन्छ । बाजुरा निवासी ओली त्यहिँको रेडियो बाजुराको स्टेशन मेनेजर हुनुहुन्छ । बाजुराबाटै उहाँ नागरिक दैनिकमा कार्यरत हुनुहुन्छ । ओली डेढ दशकदेखि पत्रकारितामा हुनुहुन्छ ।

उपत्यका प्रदेश कमिटीको अध्यक्षमा चौतारीले रामचन्द्र खड्कालाई अघि सारेको छ । खड्का दैनिक पत्रिका राष्ट्रिय सञ्जालका महासचिव हुनुहुन्छ । उहाँ यूनिटी भ्वाइस मासिकको प्रधान सम्पादक हुनुहुन्छ ।

यसैगरी एसोसिएट प्रदेशका तर्फबाट प्रेस चौतारीले डिबी खड्कालाई उम्मेदवार बनाएको छ । खड्का नेपाल लाइभ अनलाइनमा काम गर्नुहुन्छ । बाजुरा निवासी खड्का डेढ दशकदेखि पत्रकारितामा हुनुहुन्छ । खड्का स्वास्थ्य र संसदीय रिर्पोटिङ गर्न खास दखल राख्नुहुन्छ ।

यसैगरी प्रतिष्ठान प्रदेशबाट चौतारीले उद्धवकुमार कार्कीलाई अध्यक्षमा उम्मेदवार बनाएको छ । डेढ दशकदेखि टेलिभिजन पत्रकारितामा रहेका कार्की हाल न्यूज ट्वान्टी फोर टेलिभिजनका डेस्क सम्पादक र प्रस्तोता समेत हुनुहुन्छ । उहाँ हाल सोही प्रदेश समितिको सचिव हुनुहुन्छ ।