काठमाडौं- शनिबारदेखि काठमाडौंमा सुरू भएको त्रिकोणात्मक टी-२० सिरिजको पहिलो खेलमा नेदरल्याण्ड्सविरुद्ध नेपाल ९ विकेटले विजयी भएको छ ।
नेदरल्याण्ड्सले दिएको १ सय ३७ रनको लक्ष्य नेपालले १५ ओभरमा एक विकेट गुमाएर पूरा गर्यो ।
नेपालका लागि कुशल भुर्तेल र आशिफ शेखले उत्कृष्ट ब्याटिङ गनुभयो । कुशलले ४६ बलमा पाँच चौका र पाँच छक्कासहित ६२ रन बनाउनुभयो ।
योसँगै उहाँले डेब्यू म्याचमै कम बलमै अर्धशतक बनाउने कीर्तिमानसमेत बनाउनुभएको छ । कुशलले ३० बलमा अर्धशतक पूरा गर्नु भएको थियो ।
त्यस्तै, अर्का ओपनर शेखले ३८ बलमा चार चौका चार छक्कासहित अविजित ५४ रन बनाउनुभयो । उहाँको पनि यो डेब्यू म्याच हो ।
आशिफ र कुशलबीच पहिलो विकेटका लागि ११६ रनको साझेदारी बन्यो । योसँगै उहाँहरूले पारस खड्का र ज्ञानेन्द्र मल्लको कीर्तिमान भंग गर्नु भएको थियो ।
यसअघि टी-२० मा नेपालको तर्फबाट पहिलो विकेटका लागि पारस र ज्ञानेन्द्रबीच १०८ रनको साझेदार बनेको थियो । उहाँहरूको सो कीर्तिमान आज कुशल र आशिफले भंग गर्नु भएको थियो ।
नेपालको जितमा कप्तान ज्ञानेन्द्र मल्लले नटआउट १३ रनको योगदान दिनुभयो ।
बलिङमा जुलियनडे मेले एक विकेट लिनुभयो ।
त्यसअघि, कीर्तिपुरस्थित त्रिवि क्रिकेट मैदानमा टस हारेर ब्याटिङको निम्तो पाएको नेदरल्याण्ड्सले निर्धारित २० ओभरमा ४ विकेट गुमाएर १ सय ३६ रन बनायो ।
उसका लागि बासडी लीडेले ४१, स्कट इड्रवासले ३०, म्याक्स ओदाउदले १०, कप्तान पीटार सीलारले नटआउट २२ र एनोनियस स्टालले अविजित २० रन बनाउनुभयो ।
बलिङमा सन्दीप लामिछानेले सर्वाधिक दुई विकेट लिनुभयो ।
उनले चार ओभरमा २२ रन दिएर दुई विकेट हात पार्नुभएको हो । त्यस्तै, साहब आलम र सोमपाल कामीले एक/एक विकेट लिनुभयो ।
प्रतिक्रिया