काठमाडौं– चार महिनादेखिको संवादहीनता तोड्दै नेकपा एमालेका अध्यक्ष एवं प्रधानमन्त्री केपी शर्मा ओली र वरिष्ठ नेता माधवकुमार नेपालबीच बुधबार सर्प्राइज भेट भएको छ ।
नागपोखरीस्थित होटल मेरियटमा साँझ करिब ६ बजेदेखि दुई शीर्ष नेताबीच कोठा नम्बर ९०१ मा भेट जारी छ । भेटमा पार्टी विवाद निरुपण गर्दै नयाँ समझदारी निर्माण गर्नेबारे छलफल भइरहेको छ ।
दुई नेताबीच भेट तय भएपछि साँझ नेता नेपाल मेरियट पुग्नुभएको थियो । त्यसको सात मिनेटपछि प्रधानमन्त्री पनि पुग्नुभयो । सुरुवाती भेटमा अर्थमन्त्री विष्णु पौडेल पनि सँगै हुनुहुन्थ्यो । अर्कै कार्यक्रमका लागि मेरियटमा रहनुभएका पौडेल भेट सुरु भएलगत्तै बाहिरिनुभयो ।
दुवै नेताबीच भेट भएको केही मिनेटसम्म बोलचाल सुरु भएन । केहीबेरमा प्रधानमन्त्री आफैंले माधव नेपालतिर हेर्दै ‘कस्तो छ तपाईंलाई’ भनेर संवाद सुरु गर्नुभएको थियो ।
तत्कालिन नेकपा रहँदा पुष्पकमल दाहाल प्रचण्डसँग मिलेर प्रधानमन्त्री ओलीलाई अध्यक्ष र प्रधानमन्त्री दुवै पदबाट हटाएको घोषणा गरेपछि दुई नेताबीच तित्तता बढेको थियो । पछि सर्वोच्च अदालतले एमाले र माओवादी केन्द्रलाई अलग अलग दलकोरुपमा पुनर्स्थापना गरिदिएपछि पनि अध्यक्ष ओली र नेपालबीच सम्बन्ध सुमधुर रहेन ।
नेपालको समानान्तर गतिविधि र अध्यक्ष ओलीको स्पष्टीकरणपछि एमाले दुई टुक्रा हुने आशंका बढिरहेकाबेला भएको शीर्ष वार्तालाई चासोका साथ हेरिएको छ ।
प्रतिक्रिया