काठमाडौं- गीतकार तथा निर्देशक चेतन कार्कीको निधन भएको छ । उहाँको छाउनीस्थित सैनिक अस्पतालमा उपचारका क्रममा आइतबार ८३ वर्षको उमेरमा निधन भएको हो।

दुई हप्ताअघि भारतको देहरादूनबाट काठमाडौं आउनुभएका कार्कीलाई ज्वरो आएपछि अस्पताल भर्ना गरिएको थियो । उहाँको जन्म १९९५ कात्तिक २२ गते स्याङ्जाको थुमआरुखर्कमा भएको थियो ।

‘परिवर्तन’ सिनेमाको पटकथा र गीत लेख्नुभएका कार्कीले विश्वास, भूमरी र पहिलो प्रेम सिनेमा निर्देशनसमेत गर्नु भएको थियो ।

उहाँ ‘दाइलाई बोलाउँ भने लेक स्वर पुग्दैन’, ‘तीजको रहर’, ‘माया पिरतीको चोखो कथा’, ‘छोरीको जन्म हारेको कर्म’, ‘बैनीको दया छ’ भने जस्ता चर्चित गीतका रचनाकारसमेत हुनुहुन्थ्यो ।

उहाँका दुई छोरा तथा श्रीमती हुनुहुन्छ ।