काठमाडौं- नेकपा एमालेभित्रको विवाद समाधानका लागि अध्यक्ष एवं प्रधानमन्त्री केपी शर्मा ओली र वरिष्ठ नेता माधवकुमार नेपालबीच वार्ता सुरू भएको छ ।

प्रधानमन्त्री ओली र नेपालबीचको वार्ता दिउँसो साढे १ बजेदेखि सुरू भएको हो ।

यसअघि दुई पक्षबीच भएको छलफलमा पार्टीको समस्या समाधान गर्न एक कार्यदल बनाउने र सो कार्यदलको सुझावका आधारमा समस्या समाधान गर्ने सहमति भएको थियो । शुक्रबार भएको सो छलफलले कार्यदल बनाउने अधिकार दुई नेतालाई दिएको थियो ।

आजको बैठकमा दुई नेताले कार्यदलका सदस्यको बारेमा छलफल गर्ने बुझिएको छ । दिउँसो हुने छलफलमा दुई नेताले कार्यदलमा बस्ने नेताहरूको टुंगो लगाउने बताइएको छ ।