काठमाडौं– लुम्बिनी प्रदेशका मुख्यमन्त्री शंकर पोखरेलले केपी ओलीका नाममा प्रणाली कमजोर बनाउने प्रयास भएको बताउनुभएको छ ।

दुई दशकअघि गिरिजाप्रसाद कोइरालाविरुद्धको घेराबन्दी सम्झंदै पोखरेलले समयक्रममा कोइरालालाई जस्तै ओलीको खोजी हुने उल्लेख गर्नुभएको छ । ‘अहिले केपी शर्मा ओलीका विरुद्धमा जस्तै अढाई दशक पहिले नेपाली राजनीति गिरिजाप्रसाद कोइरालाका विरुद्धमा केन्द्रित थियो । त्यतिबेला उहाँको तीव्र विरोधसँगै नेपाली राजनीतिक परिस्थिति झनै जटिल बन्दै गयो,’ पोखरेलको भनाइ छ, ‘मुलुक बहुआयामिक द्वन्द्वको शिकार बन्न पुग्यो । पछि नेपाली राजनीतिलाई ट्रयाकमा ल्याउन सबैले उहाँको खोजी गर्नु पर्‍यो । अहिले नेपाली राजनीति पुनः त्यही बाटो हिड्न लागिरहेको भान भइरहेको छ ।’

प्रधानमन्त्री केपी शर्मा ओलीकाविरुद्धमा पार्टी भित्र र बाहिरका शक्तिहरुएक ठाउँ उभिएकाले विकल्प र समाधान दिने अपेक्षा र विश्वास आम मानिसको नभएको पोखरेलको भनाइ छ । ‘बरु प्रमुख नेताहरुको बढ्दो घेराबन्दीले उहाँप्रति नै सर्वसाधारणको सहानुभूति बढ्दो छ । आम मानिसहरुले अहिलेको विवादलाई कुर्सीको लुछाचुडीका रुपमा मात्र बुझिरहेका छन् । अनि यसबाट अत्तालिएका प्रतिपक्षीहरु विरोधका नाममा प्रणालीलाई नै कमजोर बनाउन उद्दत देखिएका छन्,’ पोखरेल भन्नुहुन्छ, ‘दलीय अनुशासन र संसदीय प्रणालीका विरुद्धको कदमले अन्ततः व्यवस्थालाई नै कमजोर बनाउने निश्चित छ । त्यस्तो अवस्थामा विगतमा गिरिजाको खोजी भएजस्तै भविष्यमा उत्पन्न हुने संकटको समाधानका लागि केपी शर्मा ओलीको खोजी गर्नुपर्ने अवस्था नआउला भन्न सकिन्न । तसर्थ समयमै आफ्नै इतिहासवाट शिक्षा लेउ र सही बाटोमा अघि बढौं ।’