काठमाडौं– तीन दिनअघि एमाले अध्यक्ष केपी शर्मा ओलीले भन्नुभएको थियो– ‘आफ्नै सरकार ढालेको छ, आफ्नै प्रधानमन्त्री ढाल्न देउवासँग हिंडेको छ, फेरि एमाले वरिष्ठ नेता भन्दै ङीच्च दाँत देखाएर हिँडेको छ ।’

प्रेस चौतारीको कार्यक्रममा प्रधानमन्त्री एवं एमाले अध्यक्ष ओलीले माधवकुमार नेपालले एमाले वरिष्ठ नेता भन्दै हिँडेकोमा आलोचाना गर्नुभएको थियो । त्यसको भोलिपल्ट बसेको स्थायी कमिटी बैठकले नेपालसहित ११ नेतालाई कारबाही गरेर साधारण सदस्यबाटै हटाइदियो ।

एमालेले कारबाही गरे पनि एमाले वरिष्ठ नेता, पूर्वप्रधानमन्त्री र स्थायी कमिटी सदस्यको परिचय दिंदै आउनुभएका नेता नेपालले मंगलबारदेखि परिचयविहीन विज्ञप्ती जारी गर्न थाल्नुभएको छ । उहाँले मंगलबार जारी गर्नुभएको विज्ञप्तीमा आफ्नो नाम र जिम्मेवारी दुवै उल्लेख छैन ।

बुधबार नेता नेपालले बुद्ध यन्तीका अवसरमा अर्को शुभकामना सन्देश जारी गर्नुभयो, त्यसमा पनि पदीय जिम्मेवारी उल्लेख छैन । नेता नेपालको फेसबुक पेजको ठेगाना माधवनेपालयुएमएल रहेको छ । परिचय खण्डमा पनि पूर्वमहासचिव र पूर्वप्रधानमन्त्री उल्लेख छ ।

काठमाडौंमा २०७१ असारमा भएको महाधिवेशनमा प्रतिस्पर्धी केपी शर्मा ओलीसँग ४३ मतले पराजित हुनुभएका नेपाल स्थायी कमिटी सदस्यमात्रै हुनुहुन्थ्यो । एमाले रहँदा तेस्रो वरीयतामा रहनुभएका नेता नेपाल माओवादीसँग एकता भएपछि बनेको नेकपामा झलनाथ खनालको वरीयता खोस्दै तेस्रो स्थानमै रहनुभएको थियो ।

एमालेमा निवर्तमान अध्यक्षका हैसियतले खनाल वरिष्ठ नेता हुनुहन्थ्यो ।