काठमाडौं– नेकपा एमाले भित्र सहमतिको विन्दु पहिल्याउन बिहीबार साँझ पनि करिब दुई घण्टा  बैठक भएको छ ।

संस्थापनतर्फबाट कार्यदलका संयोजक सुवासचन्द्र नेम्वाङका अनुसार हिजो समिट होटलमा साँझ साढे ६ बजे देखि दुई घण्टा छलफल भएको हो । ‘सहमतिको विन्दु पहिल्याउन र पार्टीलाई एकतावद्ध बनाएर लैजान हामी निरन्तर लागेकै छौं,’ नेम्वाङले नेपाली बहस डट कमसँग भन्नुभयो, ‘धेरै कुरामा सहमति भएको छ । सबै सहमति एकमुष्ट रुपमा बाहिर आउँछन् । छलफलको क्रममा रहेकाले अहिले धेरै कुरा भन्न मिल्दैन ।’

आफूहरुले बनाउँदै गरेको सहमति पार्टीभित्रैबाट कसैले भत्काउने प्रयास पनि गरिरहेकोले छलफलले धेरै समय लिएको नेम्वाङले बताउनुभयो । तर कसले कसरी पार्टी मिल्न अवरोध गरिरहको छ भन्ने कुरा उहाँले खुलाउनुभएन ।