काठमाडौं– नेकपा माओवादी केन्द्रले एमाले प्रवेश गरेका स्थानीय तहका जनप्रतिनिधिलाई हटाउने निर्णय गरेको छ ।

सोमबार भर्चुअल विधिबाट बसेको केन्द्रीय समितिको आकस्मिक बैठकले उनीहरुलाई पार्टीबाट निष्कासन गर्ने निर्णयलाई औपचारिकता दिएको नेता नारायाणकाजी श्रेष्ठले जानकारी दिनुभयो । माओवादी केन्द्रबाट चुनाव जितेर एमाले प्रवेश गरेका जनप्रतिनिधि १४ जना छन् ।

यसअघि बसेको माओवादी केन्द्रको केन्द्रीय समितिको बैठकले दल त्याग गरेकाहरुलाई कारबाही गर्ने निर्णयको अधिकार अध्यक्ष प्रचण्डलाई दिएको थियो । तर, निर्वाचन आयोगले केन्द्रीय समितिको बैठकले कारबाहीको निर्णय नभएको भन्दै दल त्यागको सूचना जारी गरेको थिएन ।

पार्टीबाट हटाइएका नेताहरुकोबारेमा दल त्यागको सूचना निर्वाचन आयोगले प्रकाशित नगरेको भन्दै आइतबार माओवादी केन्द्रका नेताहरुले आयोग पदाधिकारीलाई भेटेर ध्यानाकर्षण गराएका थिए ।