काठमाडौं– एमाले नेता भीम आचार्यले पार्टी भित्र अहिले भएका विवाद र द्वन्द्वहरुलाई उपयुक्त समयमा समिक्षा गरेर पार्टी एकतालाई जोगाउनु पर्ने बताउनुभएको छ ।

सामाजिक सञ्जालमा लेख्दै नेता आचार्यले एमाले विवादका कारण २०६२/०६३ को जनआन्दोलनले ल्याएका उपलब्धिहरु संकटमा परेको बताउनुभएको छ ।

यी उपलब्धीहरुको रक्षा गर्न एमालेमा सहमतिको वातावरण आवश्यक रहेको उहाँले बताउनुभएको छ । उहाँले एमालेलाई एकताबद्ध बनाउन ६ बुँदे सुत्र अघि सार्नु भएको छ ।

आचार्यले यतिबेला एमालेभित्रको किचलोले सिंगो राष्ट्रिय राजनीति विथोलिएको बताउनुभएको छ । सामाजिक सञ्जालमा लेख्दै नेता आचार्यले सामाजिक सञ्जालमा लेख्नुभएको छ ‘२०६२÷६३ को जनक्रान्तिले ल्याएका उपलब्धिहरु संकटमा परेका छन् । अहिले नेकपा एमालेभित्र घात–प्रतिघात, गुट–उपगुट, विश्वास–अविश्वास, कारबाही–प्रतिकारबाही, समर्थन–विरोधजस्ता क्रियाकलापहरु भइरहेका छन् । गत फागुन २८ गते एमालेको नाममा एउटा गुटले गरेका विभाजनकारी निर्णय र गतिविधिहरु यसको मुख्य स्रोत हो ।’

आचार्यले सुझाएका सुत्रहरु

१. पार्टीको नवौँ राष्ट्रिय महाधिवेशनले निर्वाचित गरेको केन्द्रीय कमिटी र आफ्नो अधिवेशन र सम्मेलन तथा वैधानिक प्रक्रियाबाट आएका मातहत कमिटी, जनसंगठन तथा पेसागत संगठनहरु तुरुन्तै बिनासर्त सुचारु गरिनुपर्छ । सार्बभौम सदस्यहरुबाट निर्वाचित कमिटी सुचारु गर्न यो वा त्यो सर्त राख्नु गलत र अनधिकृत हो ।

२. गत फागुन २३ पछि नेकपा एमालेका नाममा गरेका भनिएका सबै गुटका सबै निर्णयहरु खारेज गरिनुपर्छ र गरिएका सबै कामहरु अवैध घोषणा गर्नुपर्दछ ।

३. पार्टीभित्रका गुटहरुको टकरावका कारण यसबीच भएका द्वन्द्व र कामहरुको उपर्युक्त समयमा समिक्षा गर्दै भएका कमि कमजोरीहरु सच्याएर अगाडि बढ्ने प्रतिवद्धता आवश्यक छ ।

४. आगामी दिनहरुमा पार्टी र सरकार सञ्चालन एक भएर गर्ने र आएका चुनौतीहरुको एकतावद्ध भएर सामना गर्नु पर्दछ ।

५.पार्टीलाई विधि–विधान र स्थापित मान्यताहरुको आधारमा सञ्चालन गर्नुपर्दछ ।

६. नेतृत्वले रिस, राग, बदलाभाव, अहंकार, हिनताबोध त्यागेर धैर्य र संयमताका साथ पार्टीलाई एकतावद्ध बनाउने र सबै वामपन्थी र लोकतान्त्रिक शक्ति र पार्टीहरुसँग सुमधुर सम्बन्ध राख्दै सिंगो राष्ट्रलाई एकताबद्ध बनाएर क्रान्तिका उपलब्धिहरु रक्षा गर्दै विकास र समृद्धिको बाटोमा अघि बढनुपर्दछ ।