काठमाडौं– सर्वोच्च अदालतबाट पुनर्बहाली भएका कर्णाली प्रदेशका चार सांसदमध्ये तीन जना पुनः निलम्बनमा परेका छन्। नेकपा एमाले संसदीय दलको निर्णयअनुसार प्रदेश सभा सचिवालयले उनीहरुलाई निलम्बित गरेको हो ।

सचिवालयले शुक्रबार एक सूचना जारी गर्दै एमाले संसदीय दल कर्णाली प्रदेश बैठकको निर्णयअनुसार भौतिक पूर्वाधारमन्त्री अम्मरबहादुर थापा, उद्योगमन्त्री नन्दसिंह बुढा र भूमिमन्त्री कुर्मराज शाहीलाई निलम्बित गरिएको जनाएको छ।

यसअघि कारबाहीमा परेका उनीहरु पुनर्बहालीको माग गर्दै सर्वोच्च अदालतमा पुगेका थिए। सर्वोच्चले अन्तरिम आदेशमार्फत् उनीहरुलाई पुनर्बहाली गरिदिएको थियो।