सिन्धुपाल्चोक– सिन्धुपाल्चोक जिल्ला संघीय निर्वाचन क्षेत्र नम्बर २ मा तीनवटा पक्की पुल निर्माण हुने भएको छ ।

संघीय मामिला तथा सामान्य प्रशासन मन्त्रालय मार्फत ‘स्थानीय स्तरका सडक पुल तथा सामुदायिक पहुँच सुधार परियोजना’ शीर्षक अन्तरगत ,तालामाराङ भट्टार मोटरेबल पुल,कलुङखोला मोटरेबल पुल हेलम्बु ५ र सिपाखोला पुल ,अर्चले बुढिचौर ,ईन्द्रावती ८ मा पक्की पुल निर्माणका लागि बजेट बिनियोजन गरिएको हो ।

२०७१ सालबाट पहल गरिएको तर विविध कारणले निर्माण हुन नसकेका मोटरेबल पुलहरुको लागी यस बर्ष रकम बिनियोजन गरिएको र छिटोभन्दा छिटो टेन्डर प्रकृयामा लैजान सम्बन्धित निकायलाई निर्देशन गरिने पूर्वमन्त्री शेरबहादुर तामाङले बताउनुभयो ।

गत असार १ गते मेलम्ची खोला र ईन्द्रावती नदीमा आएको भीषण बाढीका कारण सो क्षेत्रका ५ वटा पक्की पुल बगाएको हुँदा हेलम्बु ,पाँचपोखरी थाङपाल , ईन्द्रावती गाउँपालिका र मेलम्ची नगरपालिकाका केही वडाहरु सडक सन्जालबाट बिमुख भएको अवस्थामा सो पुलहरु निर्माण हुँदा स्थानीय उपभोक्ताहरुलाई ठूलो राहत मिल्ने माननीय तामाङका स्वकीय सचिव निर्मल बन्जाराले बताउनुभयो ।

विगत लामो समयदेखि समस्यामा रहेका स्थानीयबासीहरुलाई उक्त पुलहरु निर्माण हुँदा ठूलो राहत मिल्ने मेलम्ची वडा नं ६ र ७ का वडा अध्यक्षहरु जितराज थापा र ज्ञानेन्द्र श्रेष्ठ बताउनुहुन्छ ।