काठमाडौं- राष्ट्रिय परीक्षा बोर्डले २०७७ को माध्यमिक शिक्षा परीक्षा (एसईई) को आन्तरिक मूल्यांकनको नतिजा साउनभित्र सार्वजनिक गर्ने तयारी गरेको छ ।

परीक्षा बोर्ड, परीक्षा नियन्त्रण कार्यालय (कक्षा १०) का परीक्षा नियन्त्रक रुद्र अधिकारीका अनुसार साउनभित्रमा नतिजा सार्वजनिक गर्ने लक्ष्य लिइएको छ ।

‘अहिले विद्यालयले सम्बन्धित जिल्लाको शिक्षा विकास तथा समन्वय इकाइमा आन्तरिक मूल्यांकन गरेको नम्बर पठाएका छन्, ती नम्बर यो महिनाको मसान्तसम्ममा बोर्डमा पठाउँछन्,’ परीक्षा नियन्त्रक अधिकारीले भन्नुभयो ।

बोर्डमा नम्बर प्राप्त भएपछि इन्ट्री र रुजु गरिने छ । ‘समयमा सबै आन्तरिक मूल्यांकनको नम्बर प्राप्त भएमा साउनभित्रमा नतिजा प्रकाशित हुन्छ,’अधिकारीले भन्नुभयो ।