काठमाडौं– १६ औं संस्करणको युरोकप फुटबलको दोस्रो सेमिफाइनल खेलमा आज राति इङ्ल्यान्ड र डेनमार्क प्रतिस्पर्धा गर्नेछन् ।

वेम्बली स्टेडियममा हुने दोस्रो सेमिफाइनलमा खेल राति १२:४५ बजे सुरु हुनेछ ।

इङ्ल्यान्ड क्वाटरफाइनलमा युक्रेनमाथि ४–० गोलको जित निकाल्दै अन्तिम चारमा पुगेको थियो भने डेनमार्क क्वाटरफाइनलमा चेक रिपब्लिकलाई २–१ गोल अन्तरले हराएर सेमिफाइनलमा पुगेको हो ।

यस खेलको विजेताले फाइनलमा इटालीसँग प्रतिस्पर्धा गर्नेछ । इटाली पहिलो सेमिफाइनलमा स्पेनलाई पेनाल्टी सुटआउटमा ४–२ ले हराएर फाइनल प्रवेश गरिसकेको छ ।