काठमाडौं– नेकपा माओवादी केन्द्रका अध्यक्ष पुष्पकमल दाहाल (प्रचण्ड) मन्त्री आतंकले तीन चार दिन आफू ठूलो तनावमा परेको बताउनुभएको छ ।

आज नरबहादुर कर्मचार्यको स्मृतिमा पेरिसडाँडाँमा आयोजित कार्यक्रममा दाहालले आफूले पाउनेभन्दा सात दोब्बर बढी सांसदले मन्त्रीको माग गरेकोले आफू नै आतंकित भएको बताउनुएको हो ।

पेरिसडाँडाँ आउँदा पनि मन्त्री माग्नेको ठूलो भीड छलेर आएको उहाँले बताउनुभयो । आफ्नो पार्टीका ४९ जनै सांसदलाई मन्त्री चाहिएकोमा उहाँले आक्रोश पोख्नुभयो । ‘हाम्रा ४९ जना सांसद सबैलाई मन्त्री चाहिएको छ । हामीले पाउने बढी पाइयो भने सात जना हो,’ प्रचण्डले भन्नुभयो, ‘मन्त्री नभयो भने चाहिँ नेतृत्वलाई सरापेर हिँड्नु । हाम्रो कल्चर भइसक्यो ।’

आफू कसरी मन्त्री आतंकबाट पीडित छु भन्ने कुरा दाहालले यसरी सुनाउनुभयो, ‘मन्त्री बन्न दबाद दिने मान्छेको हुल भित्रबाट आएको छु म । आतंक छ मेरो दिमागमा । कसलाई मन्त्री बनाउने कसलाई नबनाउने? हाम्रा ४९ जना सांसद सबैलाई मन्त्री चाहिएको छ । हामीले पाउने बढी पाइयो भने सात जना हो । मन्त्री नभयो भने चाहिँ नेतृत्वलाई सरापेर हिँड्नु । मन्त्री पायो भने मात्रै जबरजस्त छ के अहिले । यहाँ कसैले नियुक्ति पायो भने ठीक छ पाएन भने चाहिँ नेतृत्व बद्मासै हो भन्न बेरै नलगाउने । चार दिनदेखि म चाहिँ साँच्चै मानसिक तनावमा छु । सबै ४९ जनालाई नै बनाइदिन त मन लागेको छ नि । त्यो त हुँदैन फेरि । यसबाट के देखिन्छ भने कुरा गर्दा आदर्शका गर्ने ठूलाठूला । यस्तो हुनुपर्छ क्रान्तिकारी पार्टी, यस्तो हुनुपर्छ निष्ठा र आदर्श हामी सबैले भन्ने । तर, चित्त चाहिँ के छ भने मन्त्री पाइन्छ कि पाइदैन । पाइन्छ भने ठीक पाइदैन भने ठीक छैन । यस्तो छ क्या अहिलेको कल्चर भनेको ।’