काठमाडौं– नेकपा एमालेको वरिष्ठ नेता माधवकुमार नेपाल पक्षले प्रधानमन्त्री शेरबहादुर देउवालाई मन्त्रिपरिषद् विस्तारका लागि बाटो खोलिदिएको छ । सम्भवतः देउवाले आज नै मन्त्रिपरिषद् विस्तार गर्नुहुनेछ ।

पार्टी एकता प्रक्रिया चलिरहेको र अर्को पार्टी नबनाएकाले नेपाल पक्ष सरकारमा सहभागी नहुने जानकारी नेपालले देउवालाई दिनुभएको छ । नेपालको सुझावअनुसार देउवाले आज माओवादी केन्द्र र जनता समाजवादी पार्टीलाई सहभागी गराएर मन्त्रिपरिषद् विस्तार गर्ने तयारी गर्नुभएको बालुवाटार स्रोतले जनाएको छ ।

नेपाल निकट नेता बेदुराम भुसालले सत्तारुढ गठबन्धनले माधव नेपाल पक्षलाई सरकारमा सहभागी हुन आग्रह गर्दै आए पनि स्वीकार गर्न नसकिएको जानकारी दिनुभयो । प्रधानमन्त्री शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल प्रचण्डले नेता नेपालसँग लगातार संवाद गरी सरकारमा आउन आग्रह गरिरहेका छन् ।

बिहीबार बिहान मात्रै प्रचण्ड माधव नेपाललाई भेट्न उहाँको निवास कोटेश्वर जानुभएको थियो । तर नेता नेपालले तत्काल सरकारमा सहभागी नहुने बताउनुभएको छ ।