झापा– दमक नगरपालिकाकी उपप्रमुख गीता अधिकारीले कोरोना संक्रमण पुष्टि भएका एक जना सहयोगापेक्षी (भीख माग्ने) सडक मानवको उद्धार गर्नुभएको छ ।

दमक बसपार्कमा मागेर जीविका चलाउँदै आउनुभएका करिब ६५ वर्षीय पुरुषलाई परीक्षण गर्दा कोरोना पुष्टि भएको थियो ।

उपप्रमुख अधिकारीले विक्षिप्त अवस्थामा बसपार्कमा बसिरहेको देखेपछि ती सडक मानवलाई बुधबार दिउँसो आफ्नै गाडीमा राखेर सुरुमा नगरपालिका पुर्‍याउनुभएको थियो ।

‘नगरपालिकामा नुहाईधुवाई गरेपछि कोभिड परीक्षणका लागि अस्पताल लगिएको थियो,’ दमक नगरपालिकाकी उपप्रमुख अधिकारीले भन्नुभयो, ‘त्यसपछि जाँच गर्दा उहाँमा कोरोना पोजिटिभ देखियो ।’

दमक–१ बेलँडागीमा दमक कोभिड अस्पताल छ । उहाँलाई कोरोना पोजिटिभ पुष्टि भएपछि हाल सोही अस्पतालमा राखेर उपचार भइरहेको उपप्रमुख अधिकारीले बताउनुभयो ।

उहाँको हेरचाहका लागि नगरपालिकाले एक जना कर्मचारी खटाएको छ ।

दमक कोभिड अस्पतालकी फोकल पर्सन देवी दंगालले उपचारका लागि भर्ना भएका सडक मानव पुरुष भएको र उनको अस्वस्थताका कारण नाम र ठेगाना नखुलेको जानकारी दिनुभयो ।