काठमाडौं– पार्टी विभाजनका बेला माधुकमार नेपाललाई साथ नदिएका एमाले नेताहरूले एमाले अध्यक्ष केपी शर्मा ओलीसँग भेटघाट गर्नुभएको छ ।

नेताहरूले आज बालकोटस्थित ओलीको निजी निवास पुगेर भेटघाट गर्नुभएको हो ।

अध्यक्ष ओलीसँगको छलफलमा एमाले उपाध्यक्ष एवं बागमती प्रदेशका मुख्यमन्त्री अष्टलक्ष्मी शाक्य पनि सहभागी हुनुहुन्थ्यो । उहाँले छलफलमा आफूहरूको मूल नेतृत्व ओली नै भएको बताउनुभएको थियो । आफूहरूको साथ ओलीलाई नै रहने उहाँको भनाई थियो ।

‘मूल नेतृत्व तपाईं हो । समस्या समाधान गर्न तपाईं नै लाग्नुपर्छ । त्यसमा साथ दिन तयार नै छौं । साथ दिन तयार नभएको भए त हामी पनि कता कता जान्थ्यौं । आ-आफ्नो ढंगले हिँड्थ्यौ । हामी त गएका छैनौँ नि,’ शाक्यले भन्नुभयो ।

नेतृत्वले नै पार्टी जोगाउने र बचाउन सक्ने भएकाले अहिले ओलीको भूमिका महत्त्वपूर्ण हुने उहाँले बताउनुभयो ।

‘नेतृत्वले राम्रो पनि गर्न सक्छ, नराम्रो पनि गर्न सक्छ । पार्टीलाई एक ढिक्का बनाएर अगाडि लैजान पनि सक्छ । मूल नेतृत्व भनेको तपाईं हो । हामी पनि हो । हामी सबै हिसाबले साथ दिन्छौं । नेपालको कम्युनिस्ट आन्दोलन एक ढिक्का भएर एमालेले मात्रै बचाउन सक्छ, भन्ने सन्देश दिएर जुर्मुराएर उठौँ,’ शाक्यले भन्नुभयो ।