दाङ– राप्ती प्रादेशिक अस्पताल तुलसीपुका मेडिकल सुपिरिटेन्डेन्ट डा विनोद सिंहमाथि कार्यकक्षमै दुर्व्यवहार गर्ने अनेरास्ववियु दाङका दुई जना विद्यार्थी नेतालाई प्रहरीले पक्राउ गरेको छ ।

चिकित्सकहरुले आन्दोलन चर्काउँदै गर्दा प्रहरीले घटनाका मुख्य आरोपी दुई जनालाई सोमवार पक्राउ गरेको प्रमुख जिल्ला अधिकारी रामबहादुर कुरुम्वाङले जानकारी दिनुभयो । उनीहरुविरुद्ध स्वास्थ्यकर्मीहरुको सुरक्षा सम्बन्धी अध्यादेश २०७८ बमोजिम मुद्दा दायर गरिएको कुरुम्वाङले बताउनुभयो ।

भेरी अस्पतालमा स्वास्थ्यकर्मीमाथि हातपात भएपछि बढीमा ५ बर्षसम्म कैद सजाय हुनेगरी सरकारले यो अध्यादेश ल्याएको थियो । यसअनुसार नेपालमा पहिलोपटक स्वास्थ्यकर्मीको सुरक्षासम्बन्धी अध्यादेशबमोजिम मुद्दा दायर भएको प्रजिअ कुरुम्वाङले बताउनुभयो । बाँकी आरोपीलाई खोजी कार्य तीव्र पारिएको प्रहरीले जनाएको छ ।

दाङ प्रहरी प्रमुख सुरेश काफ्लेले घटनामा संलग्न मुख्य मान्छेहरु केही पक्राउ परिसकेको र केहीको खोजी भइरहेको बताउनुभयो । सिसिटिभी फुटेजको आधारमा व्यक्तिहरु पहिचान गरेर नियन्त्रणमा लिइरहेको र छिट्टै सबैलाई पक्राउ गर्न प्रहरी सफल हुने उहाँको भनाइ छ ।

अहिलेसम्म ४/५ जनालाई सोधपुछ गरिएको र मुख्य आरोपीमध्येका दुई जनालाई सोमवार नियन्त्रणमा लिइएको उनको भनाइ छ ।