काठमाडौं– नेपाली कांग्रेसका सहमहामन्त्री सुनिलबहादुर थापाले सरकारी स्वास्थ्य सामग्री राजनीति गरेको भन्दै स्थानीय आन्दोलित भएका छन् ।

थापाले स्वास्थ्य तथा जनसंख्या मन्त्रालयबाट पठाएको स्वास्थ्य सामग्रीमा रुख र चारतारे झण्डाको स्टीकरण र सूर्यबहादुर थापा प्रतिष्ठानको लोगो राख्नुभएको छ ।

सरकारी स्वास्थ्य सामग्रीमा राजनीति गरेको भन्दै स्थानीयले सामग्री राखिएको होटल प्यासिफिक घेराउ गरेका छन् । स्थानीयले स्वास्थ्य सामग्री वितरणमा रोकसमेत लगाएका छन् ।

थापाले सरकारी अनुदानलाई व्यक्तिगत भन्दै कोरोना संक्रमितको उपचारमा प्रयोग हुने औषधि, अक्सिजन सिलिन्डर, सर्जिकल मास्क, अक्सिजन उत्पादन गर्ने कन्सन्ट्रेटर लगायत सामग्री वितरणको तयारी गर्नुभएको थियो ।

स्वास्थ्य सामग्रीको दुरुपयोग भएकाले प्रशासनले जफत गर्नुपर्ने एमाले धनकुटाका अध्यक्ष एवं सांसद राजेन्द्र राईले बताउनुभयो । उहाँले सरकारी स्वास्थ्य सामग्री जिल्लास्तरीय कोभिड–१९ संकट व्यवस्थान समितिमार्फत् वितरण गरिनुपर्ने बताउनुभयो ।

स्थानीय प्रशासनलाई जफत गर्न आग्रह गरे पनि सत्तापक्षबाट अवरोध भएको भन्दै प्रमुख जिल्ला अधिकारी र जिल्ला प्रहरी प्रमुख पछि हटेका छन् ।