काठमाडौं– नेकपा एमालेका अध्यक्ष केपी शर्मा ओलीले जिल्लाहरूमा हुने पार्टीका वृहत्त आमसभाहरूलाई सम्बोधन गर्न काठमाडौं बाहिर निस्कनु हुने भएको छ ।

त्यसका लागि आगामी भदौ २७ गते गृह जिल्ला झापाबाट यो अभियान सुरू हुने भएको छ ।

लामो समयसम्म पार्टीमा विवाद भएका कारण कार्यकर्ताहरूमा अन्यौल उत्पन्न भएको, विभिन्न विषयमा भ्रम सिर्जना भएकोले त्यसलाई चिर्न र एकताको सन्देश दिनका लागि पनि केही नेताहरूका साथमा अध्यक्ष ओली काठमाडौं बाहिर निस्कने तयारी गर्नुभएको हो । यसैगरी सरकारले गरेका काम, पार्टी भित्रैबाट असहयोग आदिका विषयमा पनि अध्यक्ष ओलीले स्पष्ट पार्नु हुनेछ ।

त्यसका लागि अध्यक्ष ओलीले भदौ २७ गते विर्तामोडमा आयोजना हुने जिल्ला कार्यकर्ता भेलालाई सम्बोधन गर्ने कार्यक्रम तय भएको एमाले झापा अध्यक्ष चिन्तन पाठकले जानकारी दिनुभयो ।

आज बसेको जिल्ला सचिवालयको बैठकले पार्टीका सबै कमिटी र जनवर्गीय संगठनहरूलाई २०७५ जेठ २ गतेको अवस्थमा अघि बढाउने निर्णय गरेको छ ।

यसैगरी, भदौ २१ गते जेठ २ कै हैसियतमा जिल्ला कमिटी बैठक आयोजना गरिएको कार्यलय सचिव शिव ढुंगेलद्वारा जारी प्रेस विज्ञप्तिमा उल्लेख गरिएको छ ।