कपिलवस्तु– नेकपा (एकीकृत समाजवादी) मा सनाखत गर्ने जिल्लाकी एक्लो जनप्रतिनिधि निर्मला सुनार एमालेमै फर्किनुभएको छ ।

मंगलबार जिल्ला निर्वाचन कार्यालय पुगेर नेकपा (एस) मा सनाखत गर्नुभएकी निर्मलाले आफू बजार गएको बेला मौका छोपेर निर्वाचन कार्यालयमा पुर्‍याई जबरजस्ती सनाखत गराएको आरोप लगाउनुभएको छ ।

आज विज्ञप्ति जारी गर्दै शिवराज नगरपालिकाका कार्यपालिका सदस्य निर्मलाले आफ्नो काममा तौलिहवा गएका बेला निर्वाचन कार्यालयमा काम छ भनी लगेको र परिबन्दमा पारेर केही कागजातमा हस्ताक्षर गराएको उल्लेख गर्नुभएको छ ।

‘हिजो तौलिहवा कामको सिलसिलामा गएको थिए । दुई तीन जना साथीहरूले निर्वाचन आयोगमा जाम भनेर लगेर सनाखत गराउनु भयो । ५ बजे घर फर्किएपछि समाजवादीमा गएको हो भनेर फोन आयो । मिडिया र फेसबुकमा हेरे । म एमाले मै बस्छु,’ सुनारले उल्लेख गर्नुभएको छ ।

सुनारले मंगलबार नेकपा (एस) रोजेको जिल्ला निर्वाचन कार्यालयका निर्वाचन अधिकृत ज्ञानुराम पन्थीले बताउनुभयो ।

यसैगरी शिवराज नगरपालिका–१० का अध्यक्ष मञ्जु मिश्रले जसपा छाडेर लोसपामा सनाखत गर्नुभएको छ । जनता समाजवादी पार्टीबाट उप निर्वाचनबाट विजयी भहुनुभएकी मिश्राका श्रीमान् महन्त ठाकुरतर्फ लागेपछि उहाँले पतिकै दल रोज्नुभएको हो । मिश्राका पति रवीदत्त मिश्र लोकतान्त्रिक समाजवादी पाटीका केन्द्रीय नेता हुनुहुन्छ । –न्युज कारखाना