काठमाडौं– माओवादी केन्द्रका अध्यक्ष पुष्पकमल दाहाल ‘प्रचण्ड’ ले नेता कार्यकर्ताहरू पार्टी बनाउने होइन, गुट बनाउनतिर लागेको भन्दै असन्तुष्टि पोख्नुभएको छ ।

पोष्टबहादुर बोगटीको ७औं स्मृति दिवसका अवसरमा बुधबार आयोजित कार्यक्रममा प्रचण्डले अधिकांश नेता कार्यकर्तामा व्यक्तिगत स्वार्थका निम्ति अलि बढी नै लगाव देखिएको भन्दै असन्तुष्टि जनाउनुभएको हो ।

उहाँले आफ्नो पार्टी यो बीचमा कही न कही आफ्नो उद्देश्यबाट विचलित भएको पनि उल्लेख गर्नुभयो । ‘वर्ग, उत्पीडित जाति समुदायको निम्ति जसरी सम्पूर्ण रूपले समर्पित भएर आफ्नो व्यक्तिगत हित स्वार्थलाई त्याग गरेर बलिबेदीमा हामी होमिन हिँड्थ्यौं । लडाइँको मोर्चामा जान पाउँ भनेर हुन्थ्यो, तर आज त्यस्तो छैन,’ प्रचण्डले भन्नुभयो, ‘आज हामी व्यक्तिगत पद र स्वार्थका निम्ति अलि बढी नै लगाव देखाएका छौं । गुट बनाउनेतिर जाँगर देखाएका छौं । पार्टी बनाउने होइन, गुट बनाउनेतिर फाइदा हुन्छ भनेर सोच्ने प्रवृत्ति देखिएको छ । पार्टीको क्रान्तिकारी चरित्र विस्तारै विस्तारै स्खलित हुँदै अरु बुर्जुवा पार्टीजस्तै हुने दिशातिर गइराखेको छ ।’

पार्टीलाई क्रान्तिकारी बनाउन आवश्यक संरचना निर्वाचन निर्देशिका, निमयवाली, विधि, पद्धति विकास गरेर चल्नुपर्ने उहाँले बताउनुभयो । ‘हामी एउटा विशाल पार्टी हौं । नेता कार्यकर्ताको संख्याको कुरा गर्ने हो भने, आन्दोलनमा समर्पण र भावनाको कुरा गर्ने हो भने अहिले पनि माओवादी केन्द्र देशको सर्वाधिक विशाल पार्टी हो । यसको तुलना अरुसँग हुँदैन,’ उहाँले भन्नुभयो, ‘आन्दोलनमा जाने जुर्मुराएर उठ्ने पार्टी नेता कार्यकर्ता यसै पार्टीमा छन् । ५ पुसको प्रतिगमनविरुद्ध आन्दोलन नेतृत्व गर्यौ । क्रान्ति भनेपछि अहिले पनि त्यसरी नै लाखौको संख्यामा सडकमा आउन तयार रहेछन् । हामी अलिअलि बिग्रयौ भनेर ठानेको जनता बिग्रेका रहेन छन् ।’