इटहरी–भाटभटेनी सुपरमार्केट इटहरीका संचालक मिनबहादुर गुरुङ्गले इटहरी उपमहानगरपालिकाको बाढी पीडितहरूको उद्धार राहत तथा पुनस्थापनाका लागि रु.११ लाख सहयोग गर्नुभएको छ ।

यस्तो विपदको वेला उहाँले गर्नुभएको सहयोग प्रति उपमहानगरपालिकाका प्रमुख द्वारिकलाल चौधरीले सम्पूर्ण नगरबासीको तर्फबाट हार्दिक धन्यवाद ज्ञापन गर्नुभएको छ । यसअघि इटहरी उपमहानगरपालिकाको कार्यापालिका बैठकले उपमहानगरपालिकाका जनप्रतिनिधि, कर्मचारी र शिक्षकले सात दिनको पारिश्रमिक विपद राहत कोषमा जम्मा गर्ने निर्णय गरिसकेको छ । नगरप्रमुख द्वारिकलाल चौधरीले एक महीनाको तलब जम्मा गर्ने घोषणा गर्नुभएको छ ।

कार्यपालिकाको बैठकले बाढीका कारण इटहरीमा ज्यान गुमाउनेका परिवारलाई किरिया खर्च वापत रु.२५ हजार उपलब्ध गराउने निर्णय गरेको छ । यसैगरी वडाहरुमा पीडितका लागि लत्ता कपडा र मेस सञ्चालन गर्न सवै वडालाई एकलाखका दरले पेश्की उपलब्ध गराइएको छ ।