विराटनगर -नेकपा एमालेका अध्यक्ष केपी शर्मा ओलीले आज मोरङमा पार्टीका वडा सदस्य देखि केन्द्रीय सदस्यसम्मलाई एकै ठाउँमा राखेर प्रशिक्षण दिंदै हुनुहुन्छ । त्यस कार्यक्रमका लागि अध्यक्ष ओली आज ११ बजे विराटनगर जाँदै हुनुहुन्छ ।
जिल्ला अध्यक्ष ऋषी पोखरेलका अनुसार जिल्लाका सबै १७ पालिकामा हालै निर्वाचित पार्टीका वडा सदस्य देखि मोरङमा रहेका केन्द्रीय सदस्यसम्मलाई एकै ठाउँमा राखेर प्रशिक्षण दिन लागिएको हो । ‘वडाका सबै पदाधिकारी र सदस्य,पालिकाका पदाधिकारी र सदस्य,जिल्ला कमिटीका अध्यक्ष सहित सबै सदस्य,प्रदेशका अध्यक्ष सहित सबै सदस्य र मोरङमा भएका विभागका सदस्य र पार्टी केन्द्रका सबै सदस्यहरुलाई पार्टीको नीति,आसन्न दशौं महाधिवेशन,आगामी निर्वाचनको तयारीका बारेमा अध्यक्षज्यूले प्रशिक्षण दिनुहुनेछ ’ अध्यक्ष पोखरेलले नेपाली बहस डट कमसँग भन्नुभयो । कमिटीमा आवद्ध करिब ४ हजार सदस्य आजको प्रशिक्षणमा सहभागी हुने पोखरेलले बताउनुभयो ।
१२ बजे देखि करिब ३ बजेसम्म जिल्ला पार्टी कार्यलय पाञ्चालीमा प्रशिक्षण पश्चात शुभकामना आदान प्रदान कार्यक्रम राखिएको छ । कार्यक्रममा अन्य पार्टीका नेता,उद्योगी व्यापारी,कर्मचारी,प्रहरी लगायतलाई आमन्त्रण गरिएको पोखरेलले जानकारी दिनुभयो । अध्यक्ष ओली आजै चार बजे काठमाडौं फर्कर्दै हुनुहुन्छ ।