रौतहट – रौतहटको कटहरियामा गाडीको टायरमा हावा भर्ने ट्यांकी विष्फोट हुँदा एक जनाको मृत्यु भएको छ भने अर्को एकजना घाइते भएका छन् ।

कटहरीया नगरपालिका–५ स्थित बहादुरपुर टोलमा रहेको मोटर ग्यारेजमा टायरमा हावा भर्ने क्रममा ट्यांकी विष्फोट हुँदा स्थानीय समसुल मियाँको मृत्यु भएको छ । ग्यारेज सञ्चालक रहेका मियाँको टाउकोमा गम्भीर चोट लागेको थियो । उनलाई थप उपचारका लागि वीरगञ्ज लैजाने क्रममा बाटोमै मृत्यु भएको इलाका प्रहरी कार्यालय गरुडाले जनाएको छ ।

ट्यांकीमा हावा भर्ने क्रममा क्षमता भन्दा बढी हावा भरिएपछि विष्फोट भएको हुन सक्ने इलाका प्रहरी कार्यालय गरुडाका डीएसपी श्रीराम भण्डारीले बताउनुभयो । विष्फोटमा परी स्थानिय जैसी यादव घाइते भएका छन् । ट्या‌की विष्फोट हुँदा फलामको टुक्रा उछिट्टिएर यादवको दाहिने हातमा लागेको डीएसपी भण्डारीले बताउनुभयो ।

घटनाका बारेमा थप अनुसन्धान भइरहेको डीएसपी भण्डारीले जानकारी दिनुभयो ।