चितवन– नेकपा (एमाले)का सचिव योगेश भट्टराईले मतदान लम्बिए पनि प्रतिनिधिको व्यवस्थापन गरिएको बताउनुभएको छ ।

महाधिवेशनस्थलमा पत्रकारहरुसित कुरा गर्दै उहाँले आजसम्मका लागि प्रतिनिधिको व्यवस्थापन गरिएको बताउनुभयो । आजदेखि अफिसियल बाहेकलाई बस्ने व्यवस्था नगरिएको उहाँको भनाइ छ ।

भट्टराईले आज दिउँसोसम्ममा अन्तिम नतिजा आउने जानकारी दिनुभयो ।

बिहान साढे १० बजेसम्ममा २१५३ मतदातामध्ये २०६९ जनाको मत खसेको छ । अब ८४ मत खस्न बाँकी रहेको केन्द्रीय निर्वाचन आयोगका अध्यक्ष विजय सुब्बाले जानकारी दिनुभयो ।

मतदान सकिएलगत्तै मतगणना कार्य सुरु हुने सुब्बाको भनाइ छ । मुचुल्का उठाएर मतगणनाको प्राविधिक काम सुरु हुनेछ ।

विद्युतीय प्रणालीबाट मतदान भएकाले मतदान सकिएको चार घण्टाभित्रै अन्तिम नतिजा आउनेछ ।