काठमाडौं – नायिका करिश्मा मानन्धर कक्षा-१२ उत्तीर्ण हुनुभएको छ । राष्ट्रिय परीक्षा बोर्डले शुक्रबार सार्वजनिक गरेको नतिजामा उहाँ उत्तीर्ण हुनुभएको हो ।

करिश्माले आफू कक्षा १२ उत्तीर्ण भएको जानकारी दिनुभएको छ । ‘म दुईवटा विषयमा ‘ए प्लस’ ल्याएर पास भएँ’, मानन्धरले भन्नुभयो, ‘तर, समग्रमा मेरो २.४१ जीपीए आएको छ ।’

गोदावरीस्थित किटनी कलेजबाट कक्षा-१२ उत्तीर्ण गर्नुभएको उहाँ अब ग्रामीण विकास विषय लिएर स्नातक अध्ययन गर्ने तयारीमा रहेको बताउनुभयो ।

‘म अब ग्रामीण विकास लिएर पढ्ने इच्छा छ’, उहाँले भन्नुभयो, ‘यही कलेज किटनी कलेजमा ग्रामीण विकास छ कि छैन । बुझ्नुपर्नेछ ।’

किटनी कलेजमा ग्रामीण विकास विषय नभएमा उहाँले कलेज परिवर्तन गर्ने जानकारी दिनुभयो । यसैबीच गायिका रचना रिमाल पनि कक्षा-१२ उत्तीर्ण भएकी छन् ।