काठमाडौं– १७ पटक चुनाव हुँदा प्रधानमन्त्री नभएका कांग्रेस वरिष्ठ नेता रामचन्द्र पौडेललाई राष्ट्रपतिको आश्वासन मिलेको छ ।

१४ औं महाधिवेशनमा संस्थापनइतर समूहको बैठकले पौडेललाई राष्ट्रपतिको आश्वासन दिएको सम्बद्ध स्रोतले जनाएको छ । महामन्त्री शशांक कोइरालाले भने नेतृत्वका लागि ‘ससर्त’ दाबी छाड्नुभएको छ ।

शेखर कोइराला र प्रकाशमान सिंहबीच सहमति नभएसम्म पौडेल मिलनबिन्दु बन्ने सम्भावना पनि उत्तिकै बलियो छ ।

पूर्वमहामन्त्री प्रकाशमान सिंहले आफू सिनियर भएको दाबी गर्दै सभापतिमा सहयोग गर्न आग्रह गर्नुभएको छ । उहाँको भनाइ छ, ‘विषय अब शेखरदा र ममध्ये को हुने भन्ने ठाउँमा आइपुगेको छ । मैले शेखरदालाई उमेरमा तपाईं सिनियर हो, राजनीतिले होइन भनेको छु । पार्टीको मुख्य जिम्मेवारीमा बसेर अनुभव नलिएकाले कसरी पार्टी चलाउनु हुन्छ रु म गिरिजाप्रसाद कोइराला सभापति हुँदा पनि उपसभापति भएँ, सुशील कोइराला सभापति हुँदा निर्वाचित महामन्त्री भएँ।’

मुख्य पदहरूमा ‘पावर सेयरिङ’ गर्न प्रस्ताव गर्दै सिंहले भन्नुभयो, ‘शेखरलाई तपाईं प्रधानमन्त्री बन्नुहोस्, पार्टी सभापति भएपछि म प्रधानमन्त्री बन्दिनँ भन्दै आएको छु । अहिले पनि कुरा त्यसैमा छ । रामचन्द्र राष्ट्रपति बन्नुहुन्छ ।’