खोटाङ – खोटाङको केपिलासगढी गाउँपालिका-३ बासपानीका भुपु ब्रिटिश आर्मी धनबहादुर राईले गाउँमा हेलिप्याड बनाइ दिनुभएको छ । बेलायतमै रहेका राईले मृतक श्रीमतीको स्मृतिमा बासपानी वडा कार्यालय नजिकै आफ्नै जग्गामा हेलिप्याड निर्माण गरिदिनुभएको हो ।

राईले स्वास्थ्य समस्या परेका स्थानीयको उपचारमा सहयोग गर्ने गरी डाँडा सम्याएर वरपरबाट मेसिनरी पर्खाल हालेर हेलीकोप्टर ल्याण्ड गर्ने सिग्नल कंक्रिट गरेर हेलिप्याड बनाइदिएको वडाध्यक्ष खगेन्द्र गुरुङले बताउनुभयो ।

हेलिप्याड निर्माणापछि प्रसूति तथा दुर्घटनाका कारण तत्काल अस्पताल पुर्‍याउनु पर्ने बिरामीले छिट्टै उपचार पाउन सक्छन् । यसअघि स्थानीयको खेतबारीमा हेलिकोप्टर ल्याण्ड गर्नुपर्ने बाध्यता थियो । कहिले काहीं ल्याण्ड गर्ने ठाउँ नभेट्दा बिरामीको ज्यानै समेत जाने अवस्था थियो । हेलिप्याड बनाइ दिने राईलाई वडा कार्यालयले शुक्रबार सम्मान गरेको छ । भूपु ब्रिटिश आर्मी राईले श्रीमतीको कपुरथान (चिहान)लाई पनि कंक्रिट गरेका छन् ।