संखुवासभा – नेकपा एमालेका अध्यक्ष केपी शर्मा ओलीले कम्युनिष्ट पार्टीको खोल ओढेर केही व्यक्तिले एमालेको सरकार ढाल्ने काम भएको बताउनुभएको छ ।

नेकपा एमाले संखुवासभामा आठौं जिल्ला अधिवेशनको उद्घाटन गर्दै एमाले अध्यक्ष ओलीले कम्युनिष्ट पार्टीको खोल ओड्नेहरूले सरकार ढाल्ने काम गरेको बताउनुभएको हो ।

वामपन्थीको खोल ओढ्ने दक्षिणपन्थीहरूले सरकार गिराउने काम गरेको उहाँको भनाइ छ । एमालेले देशमा ल्याएको विकासको लहर देख्न नचाहनेहरूले आफू नेतृत्वको सरकार ढालेको उहाँले आरोप लगाउनुभयो ।

फागुनमा स्थानीय तहको चुनाव गरिसक्नु पर्ने भए पनि अहिलेको सरकारले चुनाव गर्ने कुनै सम्भावना नभएको उहाँको दाबी छ । अहिलेको सरकार सुशासनभन्दा लुटतन्त्रमा लागेको उहाँले बताउनुभयो ।

अहिलेको सरकार स्थानीय तहलाई प्रतिनिधिविहीन बनाएर कर्मचारीलाई जिम्मा लगाउने षड्यन्त्रतर्फ लागेको अध्यक्ष ओलीले बताउनुभयो ।

फागुनमा स्थानीय तह निर्वाचन गर्नुपर्ने भए पनि सरकारले कुनै तयारी नगरेको उहाँले बताउनुभयो । अध्यक्ष ओलीले देश विकाशको अभिभारा एमालेको काँधमा आएको समेत बताउनुभयो । वामपन्थी भन्ने माधव नेपाल र पुष्पकमल दाहाल प्रचण्डहरू प्रतिक्रियावादीको खेमामा पुगेको आरोप लगाउनुभयो ।

माओवादी केन्द्रका अध्यक्ष पुष्पकमल दाहाल प्रचण्ड र एमालेबाट विद्रोह गरेका माधव नेपाललाई संकेत गर्दै ओलीले वामपन्थी खोल ओढेर प्रतिक्रियावादी दक्षिणपन्थी शक्तिलाई साथ दिने पार्टीको पछि नलाग्न आग्रह गर्नुभयो ।