गुल्मी – गुल्मीमा भेटेनरी अस्पताल तथा पशु सेवा विज्ञ केन्द्र स्थापना भएपछि कृषकसँगै सरोकारवाला खुसी भएका छन् । केन्द्रको उद्घाटन गर्दै लुम्बिनी प्रदेशक कृषि खाद्य, प्रविधि तथा भूमि व्यवस्था मन्त्री सुमन शर्मा रायमाझीले प्रदेशमा कृषि र कृषकका थुप्रै आशा र गुनासा भए पनि क्रमैसँग पूरा हुँदै गएको बताउनुभयो ।

‘समस्या मात्र देखाएर समाधान हुँदैन । सन्तुष्टि र विकल्पहरूको पनि खोजी गरौ,’ उहाँले भन्नुभयो, ‘प्रदेश सरकारले योजनावद्ध रुपमा सवै काम गर्छ ।’

जिल्ला समन्वय प्रमुख लक्ष्मण पराजुलीले विज्ञ केन्द्र, प्रविधि र कार्यक्रमसहितको बनाउन प्रदेश सरकारलाई आग्रह गर्नुभयो । रेसुंगा नगरपालिकाका प्रमुख डिल्लीराज भुसालले निकै मेहेनत गरेर ल्याएको कार्यालय स्रोत साधनको हिसाबले उपयोगहिन बने निकै दुर्भाग्य हुने बताउनुभयो ।

लुम्बिनी प्रदेशक कृषि खाद्य, प्रविधि तथा भूमि व्यावस्था मन्त्रालय पशुपन्छी महाशाखाका प्रमुख तुल्सी भण्डारीले लामो कसरतपछि कार्यालय जिल्ला-जिल्लाहरूमा फर्काएपनि सोचे अनुसारको कर्मचारी पूरा गर्न नसकिएको बताउनुभयो । उहाँले कामसँगै अभावहरू परिपूर्ति हुँदै जाने भएकाले जनशक्ति व्यवस्थापनमा आफूहरू कस्सिएर लागेको बताउनुभयो ।

प्रमुख जिल्ला अधिकारी पुण्यविक्रम पौडेलले सबै तहका प्राविधीकहरूबिच समन्वय भए कृषकलाई केही आशा जगाउन सकिने बताउनुभयो । त्यसको लागि विज्ञ केन्द्रले स्थानीय तहका प्राविधिकहरूको क्षमता विकासमा काम गर्न पौडेलले सुझाव दिनुभयो ।

भेटेनरी अस्पताल तथा पशु सेवा विज्ञ केन्द्रका प्रमुख भरत काफ्लेले पशु स्वास्थ्य र सेवा अन्तर्गत कृषकका क्षमता विकास, प्रविधि, अनुदानसहित ल्याब व्यवस्थापन गरेर रोगको निदान र नियन्त्रणको उद्देश्य राखेर कार्यालय स्थापना भएको बताउनुभयो ।

बाख्रा व्यावसायी नविन बस्नेतले बल्ल आफुहरूलाई सिंहदरवार गाउँ आएको अनुभुति भएको प्रतिक्रिया दिनुभयो ।