काठमाडौं – नाम ठेगाना नखुलेका अन्दाजी ४० वर्षीय एक पुरुषको हत्या गरेको आरोपमा आफूलाई अघोरी बाबा बताउने शिव गिरी पक्राउ परेका छन्।

हत्या अभियोगमा गिरीलाई पक्राउ गरिएको काठमाडौं प्रहरी परिसरका प्रवक्ता एसपी दिनेशराज मैनालीले बताउनु भयो ।

दक्षिणकाली नगरपालिका–६ फर्पिङमा बस्ने ३५ वर्षीय गिरीले चिर्पटले हानेर हत्या गरेको प्रहरीले जनाएको छ।

चिर्पट प्रहारबाट गम्भीर घाइते भएका व्यक्तिको मनमोहन स्मृति अस्पतालमा उपचार हुन नसकेपछि वीर ल्याइएको थियो। शुक्रबार बिहान वीर अस्पतालमा उनको ज्यान गएको हो।

इलाका प्रहरी कार्यालय फर्पिङबाट खटिएको टोलीले अघोरीलाई पक्राउ गरेको र प्रहरी बृत्त कीर्तिपुरबाट कर्तव्य ज्यानको कसुरमा अनुसन्धान अगाडि बढाइएको एसपी मैनालीले बताउनुभयो ।