चितवन– नेपाली कांग्रेसका प्रवक्ता डा. प्रकाशशरण महतले स्थानीय तहको निर्वाचन आउन लागेकाले सतर्क रहन कार्यकर्तालाई निर्देशन दिनुभएको छ ।

चितवनमा संवाददाताहरुसित कुरा गर्दै महतले कम्युनिस्ट पार्टी जुनसुकै बेला मिल्न सक्ने भन्दै निर्वाचनमा पार्टीलाई जिताउन सतर्क भएर बस्न आग्रह गर्नुभयो ।

पार्टीको लक्ष्य प्राप्तिको लागि निर्वाचन जित्नै पर्ने भन्दै उहाँले एक ढिक्का भएर निर्वाचनमा केन्द्रित हुन आग्रह गर्नुभयो । ‘कम्युनिस्टहरू जतिसुकै झगडा गरे पनि तुरुन्तै मिलेर भोट हाल्न सक्छन्’, उनले भने, ‘यसतर्फ कांग्रेस सतर्क हुनुपर्छ ।’

नेता महतले गठबन्धनको स्थायित्वका विषयमा कांग्रेसले आवश्यकताका आधारमा निर्णय लिने बताउनुभयो । ‘निर्वाचनमा गठबन्धन गर्दैनौं भन्यो भने कम्युनिस्टहरू मिल्न सक्छन्’, उहाँले भन्नुभयो, ‘त्यसको विषयमा कांग्रेसले पछि निर्णय लिने छ ।’

पूर्व परराष्ट्र मन्त्रीसमेत रहेका महतले एमसीसी सम्झौता संसदबाट पास भए नेपालमा अमेरिकी सेना आउँछ भन्ने गलत कुरा भएको बताउनुभयो ।

‘एमसीसीका बारेमा अहिले भएको विरोध नियोजित हो’, उहाँले भन्नुभयो, ‘एमसीसीलाई राजनीतिकरण गर्न खोजियो ।’ सरकारले ल्याएका प्रस्ताव संसद‍्मा टेबुल गराउनु सभामुखको दायित्व रहेको भन्दै उहाँले सरकारले ल्याएको प्रस्तावमा सभामुखले म यो संसद‍्मा पेस गर्छु, यो गर्दिनँ भन्न नमिल्ने बताउनुभयो ।