काठमाडौं – नाबालिगमाथि करणी गरेको आरोपमा जाहेरी परेपछि फरार रहेका अभिनेता पल शाहबारे प्रहरीले फिल्म निर्देशक सुदर्शन थापासँग सोधपुछ गरिरहेको छ।

पल शाहको खोजीमा रहेको प्रहरीले तीन दिनसम्म उनलाई फेला पार्न नसकेपछि निकटहरूसँग सोधपुछ थालेको हो।

थापा पल शाह अभिनित फिल्म ‘म यस्तो गीत गाउँछु-२’ का निर्देशक हुन्। थापासँग अहिले महानगरीय प्रहरी वृत्त बानेश्वरले सोधपुछ गरिरहेको हो।  

थापालाई शनिबार दिउँसो प्राइम टाइम्स टेलिभिजनमा अन्तर्वार्ता दिएलगत्तै प्रहरीले लिएर गएको बताइएको छ। अन्तर्वार्ता सकिएपछि पाँच-छ जना प्रहरी आएर थापालाई लिएर गएको, त्यसपछि अर्का निर्देशक नारायण पुरी र आफू पनि प्रहरीसँगै गएको पत्रकार ऋषि धमलाले बताउनु भयो । ‘उहाँ प्रहरीसँगै हुनुहुन्छ, हामी चाहिँ फर्कियौं,’ उहाँले भन्नुभयो । प्रहरीले पनि थापासँग जानकारी माग्ने उद्देश्यले कार्यालयमा ल्याइएको बताएको छ।

हानगरीय प्रहरी परिसर काठमाडौंका अनुसार थापालाई शाहको बारेमा जानकारीका लागि बोलाइएको बतायो।