काठमाडौं– कीर्तिपुर नगरपालिकाका जनप्रतिनिधीले आफ्नो कार्यकालको अन्त्यतिर पनि विकास निर्माणका कामलाई प्राथमिकताका साथ अघि बढाएका छन् । नगरपालिकामा आज गरिएको पत्रकार सम्मेलनमा उपप्रमुख एवं प्रवक्ता सरस्वती रिजाल खड्काले दिएको जानकारी अनुसार भदौ देखि फागुनसम्ममा ५३ वटा विकासका योजना सम्झौता भएर निरन्तर काम भइरहेका छन् ।

उपप्रमुख खड्काका अनुसार सडक निर्माण,ढल निर्माण,सामुदायिक भवन निर्माण र पुनर्ममत लगायतका काममा उपभोक्ताहरुसँग मिलेर नगरपालिकाले काम गरिरहेको छ । उपभोक्ता समेतको साझेदारीमा नगरपालिकाले यी कामहरु गरिरहेको छ ।

नगरपालिकामा आज भएको पत्रकार सम्मेलनमा जनाइए अनुसार वडा नं १ मा ५ वटा योजनाका लागि ४४ लाख ६३ हजार ७ सय रुपैयाँ नगरपालिकाले व्योहोर्ने भएको छ । यसैगरी वडा नं २ का ७ वटा योजनाका लागि ३५ लाख ८७ हजार ६ सय ७६ रुपैयाँ व्योहोर्ने भएको छ । यसैगरी वडा नं ३ का ११ वटा योजनामा ५१ लाख ८३ हजार ७ सय ५० रुपैंया बजेट छुट्याइएको छ । त्यस्तै वडा नं ५ का ४ वटा योजनामा १३ लाख १३ हजार २ सय ५० रुपैंया नगरपालिकाले लगानी गर्ने भएको छ ।

वडा नं ६ का १२ वटा योजनामा ६५ लाख १८ हजार ७ सय ५० रुपैयाँ बजेट विनियोजन गरिएको छ । वडा नं ७ का ३ वटा योजनामा २७ लाख ९ हजार रुपैंया बजेट विनियोजन गरिएको जनाइएको छ । यस्तै वडा नं ८ का २ वटा योजनामा ५ लाख रुपैयाँ बजेट विनियोजन गरिएको छ । यस्तै वडा नं १० का ९ वटा योजनामा ५० लाख ९५ हजार ५ सय रुपैयाँ बजेट विनियोजन गरिएको छ ।