काठमाडौं – नेकपा एमालेले ६ वटा महानगरपालिका र ११ वटा उपमहानगरपालिकाका मेयर तथा उपमेयरका उम्मेदवारहरुको निर्णय वैशाख १० गते गर्ने भएको छ ।

केन्द्रीय सचिवालयको विहीबारको बैठकमा प्रदेशबाट सिफारिस भएर आएका नामहरूबारे छलफल भए पनि निर्णयका लागि अर्को बैठक वैशाख १० गते बोलाइएको प्रचार विभाग प्रमुख पृथ्वीसुब्बा गुरुङले बताउनु भयो ।

उहाँका अनुसार आजको सचिवालय बैठकमा ६ वटै महानगरपालिका र ११ वटा उपमहानगरपालिकाको प्रमुख र उपप्रमुखको नाममा छलफल भएको छ ।

एमाले उपमहासचिव एवं प्रचार तथा प्रकाशन विभाग प्रमुख पृथ्वीसुब्बा गुरुङका अनुसार बैठकमा महासचिव शंकर पोखरेलले सात वटै प्रदेश कमिटीले सिफारिस गरेको नामहरु आजको बैठकमा प्रस्तुत गर्नुभएको छ । बैठकमा नामबारे थप छलफल एवं जित्न सक्ने ब्यक्तिबारे बुझ्ने भन्दै शनिवार बस्ने बैठकबाट महानगर र उपमहानगरका प्रमुख-उपप्रमुखको निर्णय गर्ने निष्कर्ष निकालेको छ । गुरुङका अनुसार ललितपुर, भरतपुर र बीरगञ्ज महानगरमा एक जनाको मात्रै नाम सिफारिश भएको छ । अन्यमा भने थुप्रैको नाम आएको छ ।

आजको बैठकले शुक्रवार सार्वजनिक हुने चुनावी घोषणापत्र र पार्टी कार्यालय स्थापनाको बिषयमा निर्णय गरेको छ । ‘पार्टी स्थापना दिवसको कार्यक्रमबारे निर्णय भयो । जसअनुसार पार्टी केन्द्रीय कार्यालय उदघाटन गर्ने, त्यसपछि चुनावी घोषणापत्र सार्वजनिक गर्ने र कम्युनिष्ट योद्धालाई सम्मान गर्ने कार्यक्रम तय भएको छ । बैठकले गण्डकी प्रदेशको हकमा सरकार बनाउन सक्ने आधार रहेको भन्दै कुनै पनि प्रदेश सांसदलाई स्थानीय तहको उम्मेदवार नबनाउने निर्णय गरेको छ ।