काठमाडौं – निर्वाचन आयोगका प्रमुख आयुक्त दिनेशकुमार थपलियाले ‘गठबन्धन’ भन्ने शब्द आयोगको कानूनमा  नभएको बताउनु भएको छ ।

आज निर्वाचन आयोगमा आयोजित पत्रकार सम्मेलनमा थपलियाले आयोगले गठबन्धन नचिन्ने बताउनु भयो ।

‘स्थानीय तहसम्बन्धी कानूनमा ‘गठबन्धन’ भन्ने शब्द छैन । हुँदै नभएको कुरा आयोगले जान्ने कुरा पनि होइन्’, उहाँले भन्नुभयो, ‘यदि कोही व्यक्तिले कुनै पनि राजनीतिक दलको उम्मेदवारको हकमा त्यो दलले दिएको मनोनयन पत्रको हकमा उम्मेदवारी दर्ता हुन्छ।’

उहाँले उम्मेदवारी दर्ता हुने व्यक्तिको हैसियत पार्टीमा के छ भन्ने कुरासँग आयोगको सरोकार नरहने पनि बताउनु भयो । प्रमुख आयुक्त थपलियाले भन्नुभयो, ‘उम्मेदवारी दर्ता हुने व्यक्ति त्यो दलको हो कि होइन, कहिले प्रवेश गरेको हो । दलमा के हैसियत छ भन्ने विषय आयोगको होइन। त्यसकारण जुन चिह्नबाट उसले उम्मेदवारी दिन्छ त्यही दलको हो भन्ने निधो हुन्छ।’

स्वतन्त्र चिह्नबाट निर्वाचन जित्यो भने त्यो स्वतन्त्र नै हुने उहाँले बताउनु भयो ।

आयोगले ३० वैशाखमा हुने स्थानीय निर्वाचनका लागि भोलि र पर्सि मनोनयन दर्ताका लागि दलहरुलाई आह्वान गरेको छ।