पोखरा – मुस्ताङको लो–घेकर दामोकरकुण्ड गाउँपालिका वडा नम्बर १ को वडाध्यक्षमा ढिन्डु ठकुरी दोस्रो कार्यकालका लागि निर्विरोध निर्वाचित हुनुभएको छ ।

२०७४ सालमा पनि उहाँसहित एमालेको प्यानल नै वडामा निर्विरोध भएको थियो । नेकपा एमालेका गाउँपालिका कमिटी अध्यक्षसमेत रहनुभएका ठकुरीको मात्र वडाध्यक्षमा उम्मेदवारी परेकाले उहाँ निर्विरोध निर्वाचित भएको निर्वाचन कार्यालयले जनाएको छ ।

दोस्रोपटक वडाध्यक्षमा निर्विरोध भएका ठकुरीले गाउँलेको सल्लाहमै पार्टीबीच प्रतिस्पर्धा नगरी गाउँको विकासमा लाग्नुपर्ने भएकाले सर्वसम्मत चयन गरिएको बताउनुभयो । चीनसँगको सिमावर्ती गाउँपालिकाका अन्य दुई वडा ३ र ४ मा पनि एमाले र कांग्रेसले बाँडेर सर्वसम्मति गरेका छन् ।

जसमा दुवै वडाका अध्यक्ष एमालेले लिएको छ भने दुई सदस्य कांग्रेसलाई दिएर बाँकी एमालेका निर्विरोध भएका छन् । अब वडा नम्बर २ र ५ मा मात्र निर्वाचन हुने भएको छ ।